Мезьса ина дивандафни аграрнай Мордовиясь? Минь занцесаськ васенце вастть Россияса и Приволжскяй федеральнай округса фкя ломанти лофцть и саразонь алхнень производстваснон коряс. Минь занцесаськ нилеце вастть Россияса и васенцеть ПФО-са жуватань и нармонень сивольть производстванц коряс. Эрь сисемце розась странаса касфтф Мордовияса. Республикась — органическяй земледелиять виияфнеманц коряс инголе молихнень ёткста фкясь. И тя лувксть ули кода поладомс сяда тов.
Регионць педа пес обеспечендакшнесыне сивольса, лофцса, алса, перень сёроса эсь вешфксонзон.
Тядде «Зрнянь сёксе-2022» Всероссийскяй агропромышленнай выставкаса аграриеньке сатсть 31 казне. Синь трудснон отмечазь 25 зрнянь, 3 сиянь и 3 бронзань медальса.
Мордовиянь Оцюнясь поздравляндазень аграрийхнень оцю сатфкс мархта, спасибась сянкса, што велень труженикне кельгозь малаткшнихть модати и работайхть совестьс коре.
2022 кизонь урожайсь — тя 1 миллион 750 тёжянь тонна сёра. «Минь няйсаськ, што республикаса ули сембе эрявикссь, штоба стабильнайста кочксемс 1,5 миллионда лама тонна сёра, а сяда тов ушедомс кочксема и 2 тёжятт, - мярьгсь Артём Здунов. - Тядде кочкафоль сянгяря снавонь рекорднай урожай — 6400 тонна. Касфневихть перень сёроть коряс импортонь полафнемать объёмонза. Мордовиясь путни няеви путкс странать производственнай безопасностенц обеспечендаманцты».
Мордовиянь Оцюнясь китькстазе: васенце вастса — велеса эряфть цебярьгофнемац. АПК-нь работникнень должен улемс доступсна тяниень пингонь инфраструктурати. Сяс регионць сяда тов кармай петнемост-мазопнемост велетнень, тяконь лувксса велень территориятнень комплекснайста виияфнемань программать коряс.
Стане жа республикань Оцюнясь шарфтсь мяль велети кадрань анокламать лангс, кошардозень хозяйствань руководительхнень полафнемс технологияса и кадраса Донецкяй и Луганскяй народнай республикань, Херсонскяй и Запорожскяй областень велень хозяйствань предприятиятнень мархта.
Мордовиянь аграрийхнень стане жа поздравляндазь Госсобраниянь Председательсь Владимир Чибиркин, Правительствать Председателец Владимир Сидоров, Россиянь Минсельхозонь представительхне.
«Ёню, асу, трудонь кельги народ эряй Мордовияса, - мярьгсь «Щёлково Агрохим» компаниять гендиректороц Салис Каракозов. - Тяниень пингонь инь од технологиятне нолявихть тевс тяса. Мордовиянь аграрийхне тиендьсазь содафокс русскяй паксять. Арьсян сембонди сатфкст».
Отраслянь представительхненди максфтольхть государственнай казнет. Мордовия Республикань Славань орденонь полнай кавалеркс арась «Норов» компаниянь группань правлениять председателец Александр Поздняков. «Карматама работама сяда тов, мон спасибан республикань Оцюняти Артём Алексеевич Здуновонди отраслять ширенц кирнеманкса» - мярьгсь сон.
Мордовия Рееспубликань Оцюнять пресс-службац