Артём Здунов нолдазе отставкас Мордовиянь Правительствать

Артём Здунов нолдазе отставкас Мордовиянь Правительствать

Тячи, 26 февральста, МР-нь Госсобраниять очередной сессиянц пингста Мордовиянь Оцюнять аф лама пингс тевонзон тиендисна Артём Здунов пачфтсь эсь решениянц колга нолдамс отставкас республиканскяй правительствать и азозень од задачатнень, конат ащихть региононь исполнительнай и законодательнай властть инголе.

«Етась 100 ши, кода Российскяй Федерациянь Президентсь Владимир Владимирович Путин макссь тейне доверия пяшкотькшнемс Мордовия Республикань Оцюнять тевонзон. Од вастса любой вятити тя пингсь макссеви сянкса, штоба ваномс-шарьхкодемс тяниень пингонь ситуациять, примамс фкя инь васенце решениятнень, тиемс эрявикс аськолкст, и шарьхкодемс – кода аськолямс сяда тов».

Республикать фкя инь васенце прябалац, кода мярьгсь Артём Здунов, тя стака экономическяй положениясь. «Тя, васендакиге шарьхкотькшневи ломаттнень емла доходснон, цебярь зарплата мархта рабочай васттнень аф сатнемаснон, Мордовияста трудоспособнай населениять тушендоманц коряс. Мекольдень кафта-колма кизотнень республикаста эрь кизоня тушендсь пцтай 2 тежятть ломань».

Нинге фкя прябалась, Мордовиянь Оцюнять аф лама пингс тевонзон тиендиснон валонзон коряс, тя ся, мес несколька предприятиясь, налогонь основной паннихне, ащихть стака финансовай положенияса, кой-конат банкротствань каршект. «Тяка пингть профильнай министерстватне аф пяшкотькшнесазь  предприятиятненди лезксонь макссемать коряс эсь функцияснон» - мярьгсь сон и поладозе. «Лядонттама фталу минь и национальнай проекттнень эряфс етафтомаснон коряс. Бюджетнай средстватнень тевс аф нолямасна, тяконь лувксса БКД суммать коряс, кона мрдафтфоль бюджетти – 243 миллион цалковай, тяфтама ситуацияса тя инь кржась национальнай проекттнень пяшкодеманкса отвечайхнень тевснонды  ответственностень апак маряк малаткшнемасна. Гособоронзакаснень пяшкодемань пингснон колсемац и объемснон кирьфнемац мон лувондса тя лицатнень ширде преступлениякс. Мордовия Республикать государственнай шумоц – 49 миллиардта лама цалковай, ули государственнай властень оргаттнень и муниципалитеттнень услугань поставщикнень инголе лама миллиардонь лувксса кредиторскяй шумосна. Сонь афкуксонь лувксонц тейнек сави нинге содамс. Пяк лама пеняцамада сашенды республикань райоттнень эзда. Госшумоть улемац лоткафнесы республикать виияфнеманц, тяниень пингть минь аш возможностеньке виияфнемс инфраструктурать, нолямс средстват социальнай сферать виияфнеманкса».

Артём Здунов азондсь и сянь колга, мезе удалась ни тиемс республикаса ситуациять петеманкса. Сатфкснень лувксса азфт. Тяда ингольдень пингонь бюджетнай законодательствать колсеманкса 15,8 миллиард цалковаень лувксса единовременнай выплатать пандоманц коряс обязательствать лоткафтомац, ванфнемок республикати 2029 кизоть самс кредиттнень коряс пандомань «пара» графикть. Тяда башка, кирьфтаф эсь пингстонза апак пантт шумось (5,3 миллиард цалковайста сявомок 2020 кизонь 1 ноябрти 3,7 миллиард цалковайс молемс 2021 кизонь 1 январти), кирьфтаф ставкась коммерческяй кредиттнень коряс 8,5 процентста сявомок 5,25 процентс молемс. Республикаса примаф государственнай финанснень шумбралгофтомаснон коряс программа.

Мордовиянь Оцюнять аф лама пингс тевонзон тиендиснон валонзон коряс удалась сатомс важнай договоренностть республикав Денис Мантуровонь визитонц пингста – кой-кона республиканскяй предприятиятнень ширеснон кирдеманц, синь мощностьснон пяшкотькшнемаснон и государственнай ширень кирдемань мератнень макссемаснон коряс.

Кемокстаф соглашения Мордовия Республикать Дивеевскяй кластерть виияфнеманц эса участвондаманц колга, мезсь лезды водендамс средстват Темниковскяй районца туристскяй и транспортнай инфраструктурать тиеманкса. Сатф договоренность Мордовияса властень оргаттнень и государственнай учреждениятнень бюджетнай учетснон вятеманц коряс федеральнай казначействать Компетенциянь центранц панжеманц коряс, мезсь максы панжемс 300 рабочай васта.

Тевс сувафтф предпринимательскяй сообществать мархта васедемань етафнемань и властть мархта бизнесть еткса виде диалогонь ладямать коряс практика. Сатфт договоренность Россиянь Минспортть мархта кой-кона спортивнай объекттнень федеральнай собственностьс максомаснон колга, мезсь лезды водендамс средстват синь кирдеманксост и тевс ноляманксост. Ушетф 2035 кизоть самс Мордовия Республикать социально-экономическяй виияфнеманц коряс Стратегиять анокламац. Парста мольфтеви коронавируснай инфекциять келемоманц каршес тюремась, а стане жа курокста панчфт прививочнай пунктт, тонафтф персоналсь, рамаф оборудования прививочнай кампаниять етафтоманкса».

Важна, што республикаса нолдаф тевс управленческяй кадрань резервати сувафтоманкса оцю кадровай конкурс», - меколи азозе Артём Здунов.

Тяка пингть, региононь вятись азозе вов мезть: «Правительствать председателец, профильнай министерствань кой-кона представительхне синць шаштсть шири пуромф прябалатнень решандамаснон эзда. Республикань правительствать аш планоц ладяф положенияста лисемать коряс. Сяс мон примань решения нолдамс отставкас правительствать и тянь колга Указть мон тячи кемокстайне».

Госсобраниянь депутаттненди пшкядемста Артём Здунов азозень фкя инь васенце задачатнень: «Тянь мяльса кирдезь тейнек мархтонт эряви тиемс вов мезе. Васенцесь. Одкстоптомс республикань управленческяй кадратнень. Ся кадровай конкурссь, конань минь азоськ, лезды  мумс лидерхт, управленецт, конат кармайхть вятемонза региононь исполнительнай властть. Омбоцесь. Тиемс реформирования властень оргаттнень функцияснонды. Колмоцесь. Тиемс Республикать нормативнай базанц од вешфксненди отвечайкс».

Корхтамок Правительствать отставканц колга, азса, што од составть пуроптомс сембе министрхне поладсазь работаснон «и.о.» приставка мархта. Кода азозе республикань Оцюнять аф лама пингс тевонзон тиендисна: «Управлениянь ся системась, кона тячи ладяф республикаса, аф отвечай ни тяниень пингонь вешфксненди».


Мордовия Республикань Оцюнять пресс-службац