20 декабрьста Мордовиянь Оцюнясь Артём Здунов ульсь Саранск ошень округонь Октябрьскяй райононь Куликовка велеса, штоба поздравляндамс Сурскяй рубежть строямаса участвондайть Татьяна Ильинична Макушкинать. Республикань вятись макссь трудонь ветеранти казнет и чайда симомста кулхцондозе аф тёждя эряфонц колга сиренять азксонц.
Татьяна Ильинична шачсь Большеберезниковскяй райононь Равжа Промза велеса. Сурскяй рубежть строямаса сон покодсь васенце шиста сявомок мекольцети молемс.
«Ульсь пяк стака. Цят моли кельмотне, кевкс эендаф модась, но минь шувоме ваймама шифтома. Эряме тозк, вирьса, шуфтонь ёмла кудняса, утцеме киякс лангса. Сашендоме и прашендоме вийфтома.», - азозе сон.
Лятфтасаськ, Сурскяй рубежть строямац мольфтевсь 1941 кизонь сёксеста сямомок 1942 кизонь январти молемс. Рубежсь строявсь Куйбышеву фашисттнень киснон перяманкса. Сон таргавсь Мордовскяй АССР-ть и шабрань областтнень эзга. Аньцек республикаса кувалмоц — 80 вайгяльбе. Рубежть эса строясть аватне и подросткатне — алятне туфтольхть фронту.
Сяда тов Татьяна Ильинична эряфоньберьф покодсь колхозса. Касфтсь колма шабат. Сонь 6 уноконза, идень 7 уноконза и уноконь 7 уноконза.
Артём Здунов сюконясь трудонь ветеранти шачема масторть инкса трудендаманкса и арьсесь теенза кеме шумбраши. «Поздравляндате тонь тя оцю илать мархта. Тон арать оцю семьянь пуроптыкс-касфтыкс! Сюкпря тейть идень и уноконь касфтоманкса. Стака арьсемс, кодама сталмот тейть савсь кирдемс Великай Отечественнай войнать пингста. Минь долгоньке — тиемс тейть кувака и сетьме эряф», - мярьгсь региононь вятись.
Мордовия Республикань Оцюнять пресс-службац