Вековой юбилеенц 10 ноябрьста отмечазе Саранскяень эряйсь Екатерина Ивановна Макевнина. Иланц мархта тылонь труженицать, трудонь ветеранть поздравляндама сашендсь Мордовиянь Оцюнясь Артём Здунов.
Чайда симомста региононь руководительсь корхнесь юбилярть и сонь семьянц мархта, кизефнесь эряфонь кинц колга.
Екатерина Ивановна шачсь Ромодановскяй райононь Малые Березники велеса. Школать шумордамда меле ётась бухгалтеронь курсат и войнать пингста работась «Победа» артельса, кона заняфоль военнайхненди щамонь стамаса. Великай Отечественнай войнать шумордамда меле лиссь рьвакс кадровай военнайти, кона участвондась Ленинградть араламаса. Кода военнослужащаень семьясь ётазе пяле странать, эрясть Китайса Порт Артурса, Екатерина Ивановна сембе вастова тиендсь семьянь кеме тыл. Мордовияса кадровай военнайсь Макевнин Иван Матвеевич работась «Резинотехника» заводса, сон кулось 1992 кизоня. Екатерина Макевнинать семьяса кафта стирьхть, кафта унокт, идень унок и уноконь кафта унокт.
Мордовиянь Оцюнясь казсь Екатерина Ивановнанди панчфонь пусма и лятфнембяленди казне. Чайда симомста лятфнезь Макевниттнень семьяснонды мяляфтомань событиятнень, корхнесть тячиень эряфть колга, ванондозь семьянь фотографиятнень. Сембе поколениятне пяк кельгсазь Екатерина Ивановнань. «Кодама решения афоль прима семьяньке, най сявондеви мяльс бабаньконь азфоц, сембе кулхцондсаськ сонь, правас коре сон – семьяньконь азороц», - мярьгсь именинницать унокоц Екатерина Юсупова. Стирец Лариса Ивановна поладозе: «Тядязе ванфтозе эрьгавшинц, сон шарфни мяль и политикати, и модати, лавкатнень эса питнетненди, внимательнайста ванны странаса и мирса ситуациять мельге». Мордовиянь Оцюнясь арьсесь Екатерина Ивановнанди лама киза эрямс. «Кизода меле надиян няемс, обязательна саян ширезонт шачема шистот», - мярьгсь сон тумстонза.
Мордовия Республикань Оцюнять пресс-службац