«Тячи тя залса пуромсть мастор лангонь инь творческяй ломаттне! Тинь мархтонт мялезе поздравондамс отраслянь лама тёжянень коллективть – сятнень, кие заняф творческяй тевса, аралакшнесы Мордовиять флагонц, няфнесы, мезсь тейнек вийс коре, - мярьгсь Артём Здунов. – Тейнек пяк важна, што пандемиянь условияса удалась ванфтомс коллектифнень, преподавательхнень, поладоськ культурань объекттнень строямаснон. Культурань учреждениятнень эса эряфсь лакай, Правительствать задачац – стройсемс и петнемс объекттнень, и минь карматама эрьгавста работама тя ширеса».
Тяфта, тядде строямань и петемань объёмтне кармайхть сяда оцюфт тяда ингольдень показательхнень коряс. 2021 кизоня шумордафоль Рузаевкаса Ухтомскяень центранц лама кизос таргаф ремонтоц. Стане жа тевс сувафтовсь республикань долгостройсь – «Саранск Арена» универсальнай залсь, конань площадензонды ули вешфкс и культурань учреждениятнень ширде.
«Карматама работама сяда тов, водендакшнемост культурнай инициативань Президентскяй фондть средстванзон творческяй проекттнень эряфс ётафтоманкса», - мярьгсь Мордовиянь Оцюнясь.
Культурнай инициативань Президентскяй фондсь – тя пяк цебярь возможность получамс ширень кирдема оцю фестивалень, арт-школань ётафтоманди, од постановканди и выставочнай проектонди.
Васенце аськолксне тя ширеса тифт ни: фондть средстванзон лангс ётафтф «Соотечественники» русскяй театрань Международнай фестивальсь, кона арась республикати брендовайкс.
Аф сяда ёмла значенияц «ЭРЬЗЯ FEST” искусствань фестивальть, джазовай музыкань «ВЭЙСЭ ДЖАЗ» Международнай фестивальть, коса участвондай мировой тяштсь Игорь Бутман, и ламоц лия фестивальнай проекттнень.
Тяда башка, ётай кизоть Саранскяйсь арась пилотнай площадкакс «Музейные маршруты России» Культурань министерствать флагманскяй проектонц ётафтоманкса.
Стане жа 2021 кизоня Мордовиясь поладсь «Пушкинская карта» проектть программанц эряфс ётафтоманцты. Водендаф средстватнень объёмснон коряс рейтингса республикась занязе 18 вастть странаса.
Республикань Оцюнясь спасибась культурань работникненди совестьс коре трудендаманкса и профессионализманкса.
Отраслянь инь цебярь представительхненди максфт государственнай казнет и специальнай премият.
Мордовия Республикань Оцюнять пресс-службац