28 декабрьста Мордовиянь Оцюнясь Артём Здунов васетькшнесь республикань предпринимательхнень мархта. Ванфтольхть прябалатне, конат аф макссихть тиендемс содафокс бизнес-проекттнень. Стане жа корхтафоль республикаса цебярь инвестиционнай климатонь тиемать колга. Лятфтасаськ, бизнесонь представительхнень мархта республикань Оцюнясь васетькшни сидеста. Предпринимательхнень кизефксснон лангс отвечакшнесть профильнай министерствань, Саранск ошень округонь администрациянь, прокуратурань и налоговай службань вятихне.
Артём Здунов мярьгсь: «Кда теенть-арам бизнесонтень коряс колсевихть закоттне, апак пельхть пшкятькшнеда прокуратурав, предпринимательхнень праваснон араламаснон коряс уполномоченнайти, тейне».
Васедемаса ванфтольхть кода частнай кизефксне, конат сотфт аф оцю производстватнень мархта, стане и оцюфне, конат канневихть целай отраслятненди. Тяфта, мишендемань фкя центрать вятиец пшкядсь Артём Здуновонди эняльдема мархта каникулатнень пингста лафчептомс QR-коттнень мархта сотф ограничениятнень. Шабрань Ульяновскяй областьса, кепотьксонди, сон аф вешеви, штоба сувамс ТЦ-в покодема шиста 8:00 частста сявомок 15:00 частти молемс.
Мордовиянь Оцюнясь тердезень компаниянь вятихнень кизефксть крхкаста ваноманкса. Кодама решения ули примаф, азови оперативнай штабть маластонь пуромкссонза.
Велень хозяйствань предприятиянь директорсь кеподезе кизефксть сянь коряс, штоба панжемс столичнай рынкатненди экопродукциянь аф оцю производительхнень лихтемаснон коряс площадка.
Артём Здунов пшкядсь велень хозяйствань и продовольствиянь министрти Александр Кечайкинонди. «Мон лятфнеса, што республикань продукциять Москувонь, Московскяй областень и Санкт-Петербургонь рынкатненди лихнеманц коряс задачать путозе странань Президентсь Владимир Путин. Кошарятядязь мольфтемс тя покодемать сяда эрьгавста», - мярьгсь региононь вятись.
Тяда башка предпринимательхне корхтасть сянь колга, што эряви анокламс регионть инвестиционнай картац, штоба сяда тёждя улель арьсекшнемс инвестпроекттнень. МР-нь экономикань, торговлянь и предпринимательствань министрть тевонзон топафтысна Алексей Грибанов азозе, што Мордовиясь сувась кемонь пилотнай проекттненди, коса кармай сай пингонь инвесторхнень мархта покодемань лац ладяф регламеент. Тя картась тиевома лангса и покоди ни тестовай режимса республикань инвестиционнай порталса.
Мордовия Республикань Оцюнять пресс-службац