Мордовиянь Оцюнять аф лама пингс тевонзон тиендисна Артём Здунов 21 апрельста примась участия Федеральнай Собранияти Россиянь Президентть Владимир Путинонь Посланиянц кулхцондомань церемонияса, кона ульсь Москуса «Манеж» Центральнай выставочнай залса. Церемонияс тертьфнень еткса Федерациянь Советонь члеттне, Государственнай Думань депутаттне, Правительствань члеттне, Конституционнай и Верховнай судонь вятихне, губернаторскяй корпуссь, Федерациянь субъектонь законодательнай собраниятнень председательсна, традиционнай конфессиянь оцюнятне, общественнай деятельхне, тяконь лувксса региононь общественнай палататнень оцюнясна, массовай информациянь средстватнень вятисна. Президентсь азозень маластонь пингонди странать социально-экономическяй виияфнеманкса ключевой ширетнень.
Мордовиянь Оцюнять аф лама пингс тевонзон тиендисна Артём Здунов, корхтамок Посланиять колга, китькстазе, што задачатне, конатнень путозень государствань оцюнясь, васендакиге, водендафт ломаттнень эряфснон цебярьгофнеманкса. Лятфтасаськ, Президентсь макссь поручения правительствати анокламс шаба мархта семьятнень ширеснон кирдеманкса программа. Августста россияниттне получайхть 10 тежянь цалковаень лувксса эрь шабать – школань тонафнить лангс фкя пингонь пандома. Президентсь азсь мяль максомс тя выплатать и сай пингонь васенце классонь тонафнихненди, конат молихть школав 2021 кизонь сексеня.
1 июльста сявомок 8 кизоста сявомок 16 кизос молемс шабатненди, конат эряйхть аф пяшксе семьяса, кармайхть пандома средняйста 5650 цалковай ковти. Тяда башка, Президентсь азсь мяль паннемс пеку аватненди, конат арасть учетс ранняй пингса и конат повсть эряфонь палас, фкя пингонь выплата – 6 тежяньда лама цалковай ковти. Нинге фкя предложениясь – штоба сисем кизонь топодемс шабать мельге якаманкса больничнайсь пандоволь зарплатать эзда 100 процентонь лувксса.
Пяк важна и региоттнень ширеснон кирнемац. Президентсь мярьгсь: «Странась вииякшни, моли инголи. Но тя лисенди аньцек эста, мзярда вииякшнихть региоттне. Минь кирдьсаськ ширеснон сятнень, кие сявонди эсь лангозонза ответственность и ноляй тевс созиданиянь проектт. Кеман, што оцю потенциалоц ули Россиянь эрь регионть. Штоба лездомс панжемс-няфтемс сонь – васендакиге, эряви кирьфтамс шумонь обязательстватнень сталмоснон». Президентсь путсь странань Правительствать инголе задача 1 июнть самс анокламс предложеният региональнай и муниципальнай финанснень лама пингс ладямаснон обеспечендаманц, региоттнень самостоятельностьснон касфнеманц коряс. Колгаст крхкаста корхтама кармай мольфтевома кизонда Госсоветть заседаниянц пингста. Тяфта, корхтамась мольфтеви бюджеттнень коммерческяй шумоснон коряс ширень кирдемать колга. Коммерческяй шумонь марнек объемть, кона 25 процентта сяда оцю регионть эсь доходонзон коряс, Президентсь азсь мяль полафтомс госкредиттнень мархта, конат пандомат 2029 кизоть самс. Стане жа тиеви реконструкция бюджетнай кредиттненди, конат максфтольхть региоттненди меля эпидемиять каршес тюреманкса. Синь пандомань пингсна етай кафта ковда меле. Синь стане жа кувалгофтовихть 2029 кизоть самс. Тяда башка, федерациянь субъекттне получайхть вииякшнемань од инструмент – инфраструктурнай бюджетнай кредитт, конат максовихть инь ламось колма процент алу 15 кизос.
«Тя и лия решениятне, конатнень азозень Посланиять эса Владимир Владимирович Путин, пяк важнайхть сембе региоттненди, но Мордовияти, сявондемок мяльс минь госшумоньконь, синь башка оцю значениясна, - китькстазе Артём Здунов. – Кода минь и учендоськ, Владимир Владимирович Путин шарфтсь башка оцю мяль региоттнень шумонь сталмоснон лангс. Тейнек тя тячиень пингонь кизефкс. Ня средстватнень минь карматама нолямост тевс од рабочай вастонь панчсеманкса и социальнай кизефкснень решандаманкса. А тяниень пингть тейнек сашендови обслуживандакшнемс тя шумотнень и паннемс синь. Тейнек оцю плюс, што тя темась кепотьфоль Посланиять эса. Минь карматама работама, штоба етафтомс эряфс сембе предложениятнень маластонь пингть»
Мордовия Республикань Оцюнять пресс-службац