27 декабрьста Мордовиянь Оцюнясь Артём Здунов пяшкодезе идень саду якайть Артём Илюшовонь од кизонь мяленц и тердезе покодемань кабинетозонза. Лятфтасаськ, синь содафтсть, мзярда региононь вятись декабрьста сашендсь цёранять сире бабанц, Сурскяй рубежть участницанц Татьяна Макушкинать сяда кизонь юбилеенц мархта поздравляндама. Эста Артём мярьгсь Мордовиянь Оцюняти, што мялец улемс Республикань Кудса.
Чайда симомста Артём Илюшов и сонь тядяц азондсть Мордовиянь Оцюняти цёранять кельгома тевонзон колга. Идень садса сон нинге занци пря математикаса и конструированияса, кельгсы рисовандаманц, налхкси футболса.
Артёмонди видеоконференциянь режимса ётафтфоль пуромкс МР-нь шумбрашинь ванфтомань министрть Олег Маркинонь, МР-нь образованиянь министрть тевонзон топафтыснон Елена Солдатовать и МР-нь спортонь и од ломанень политикань министрть Александр Савиловонь мархта. Цёрашабати азфоль мяль занямс Мордовиянь Оцюнять вастонц совещаниянь залса.
«Коллегат, васьфтесть — тя стане жа Артём Алексеевич. Тячи ВКС-ть вятьсы сон», - содафтозень идень саду якайть мархта республикань Оцюнясь.
Артём Илюшов кизефнезень министерствань оцюнятнень школань минють, шумбрашинди эрявикс витамиттнень и спортонь тялонь виттнень колга. А меле сюконясь сембе каршек валхнень инкса.
«Эрьда сувафтсаськ протоколти пуромксонькон сембе решениянзон. Тя: надияфнян лац ярхцсемс, сяда ламоня занцемс пря спортса и кулхцонкшнемс тядянень-алянень. Кда надияфтоме, эста сави пяшкодемс, виде, Артём?» - тись итокт совещанияти Мордовиянь Оцюнясь. Васедемась ётась пяк лямбоста.
Наряжаф кузнять ваксса Артёмонь учендозь Якшам Атясь и Ловонь стирнясь. Синь поздравляндазь сонь малаткшни Од кизоть мархта и казсть ламбама казне.
Мордовия Республикань Оцюнять пресс-службац