Мордовиянь Оцюнять аф лама пингс тевонзон тиендисна Артём Здунов 12 майста рабочай поездка мархта сась Атюрьевскяй району. Районть мархта содафтомать ресубликань вятись ушедозе Мокшень Козловкань велень поселениять эзда, тяса сон ульсь велень хозяйствань предприятиять животноводческяй комплекссонза, а стане жа ванозе социальнай центрать, коса фкя вельхкс ала ащихть Культурань кудсь, идень садсь, ФАП-сь, библиотекась, почтась и велень администрациясь. Центрась строяфоль 2010 кизоня велень территориятнень виияфнемаснон коряс программать мяльса кирдезь.
Школьнай стадионца Артём Здунов васетькшнесь од футболисттнень мархта. Школаса тяса тонафнихть 60 малава шаба, а сембоц велень поселенияса эряй 600 ломань. Тястонь эряйхне республикань вятить мархта корхнемста азондозь, кода эряй велесь, эняльдсть кирдемс велень хозяйствань предприятиять ширенц, коса работайхть 35 ломань.
Атерь районнай центраса Артём Здунов ванозе паркть, 90 вастонди идень од садть, кона аноклави сувафтомс тевс, а стане жа од ульцять, коса строявихть индивидуальнай кутт, тяконь лувксса государственнай жилищнай программатнень колга. Тяса аноклаф 68 модань участка, етафтф газ, водопровод, электричества, строяфт 13 куд. Од семьятне эняльдсть Мордовиянь Оцюнять аф лама пингс тевонзон тиендиснонды лездомс кить строямаса.
Районнай центраса республикань вятись стане жа корхнесь эряйхнень мархта, кулхцондозень синь эняльдемаснон, ламошкасна конатнень сотфтольхть кинь строямать и медицинскяй обслуживаниять мархта. Артём Алексеевич макссь поручения виияфтомс районнай поликлиникать специалистса «Земский доктор» программать коряс.
Мордовия Республикань Оцюнять пресс-службац