24 февральста Мордовия Республикань Оцюнять аф лама пингс тевонзон тиендисна Артём Здунов ульсь Авиационнай материалонь Всероссийскяй научно-исследовательскяй институтса (ВИАМ).
Артём Алексеевич содафтсь институтть научно-производственнай базанц мархта, тяконь лувксса лабораториятнень и малотоннажнай производстватнень, конат ноляйхть продукция авиационнай промышленностти и лия отраслятненди. Региононь Оцюняти азондсть работань ширетнень колга и институтть металлическяй и аф металлическяй материалхнень, покрытиятнень коряс инь од разработканзон квалма.
Тяфта, региононь вятись содафтсь псинь кирди сплавонь литой прутковай заготовкань, термообработкань, ионно-плазменнай покрытиянь, газотурбиннай двигателень монокристаллическяй лопаткань литьянь серийнай производствать мархта.
Башка мяль эсь лангозонза шарфни ВИАМ-ть видеса пуроптф пяшксе циклань аддитивнай производствась, конань лаца тячиень шити Россияса аш. Артём Здуновонди няфтезь авиационно-космическяй техникань деталень образецнень, конат тифт селективнай лазернай сплавлениянь методть коряс, а стане жа азондсть тя сфераса разработкатнень колга.
«Аддитивнай производствась максси касфнемс производительностть 30-крда, материалхнень тевс нолдамань коэффициентснон 0,98-с, кирьфтамс конструкциятнень сталмоснон 50 процентта топологическяй оптимизациять тевс нолязь», - китькстазе ВИАМ-ть генеральнай директороц, РАН-нь академиксь Евгений Николаевич Каблов.
Васедемать пингста ванфтольхть сотрудничендамань кизефксне. Артём Здуновонь валонзон коряс, корхтамась мольфтевсь Мордовиянь Технопаркть виияфнеманц колга, маластонь пингть етафтови Технопаркть Научно-техническяй советонц заседанияц, конань вятьсы Евгений Каблов. Стане жа корхтафоль регионца производствань сферать виияфнеманц квалма – тяконь лувксса оптическяй волокнать производстванц коряс предприятиять (ОВС) и «Электровыпрямитель» заводть.
Мордовия Республикань Оцюнять пресс-службац