19 февральста Мордовиянь Оцюнять аф лама пингс тевонзон тиендисна Артём Здунов етафтсь совещания, конань пингста корхтамась мольфтевсь республикаса педа-пес апак строяк объекттнень колга. Мордовияса эздост 1270 лама, эзост нолдаф 16,5 миллиард цалковай, тя объекттнень ламошкасна – афкуксоннет, строяфт педа-пес и синь нолясазь тевс собственникне. Тя «невидимкатне», конат получсесазь сембе коммунальнай и инфраструктурнай лия уликсшитнень, аф «няевихть-мушендовихть» налоговай оргаттненди и, кода следствие – синь арсихть паразит лаца муниципальнай образованиятнень эса, аф каннемок местнай бюджетти тяшкава эрявикс пандомат.
МР-нь экономикань, торговлянь и предпринимательствань министрть тевонзон тиендиснон валонзон коряс, педа-пес апак строяк объекттнень ламошкасна ащихть Минстройть, МинЖКХ-ть и Саранск ошень округонь администрациять балансса – эздост 900 лама, эзост нолдаф пцтай 15 миллиард цалковай. «2021 кизоня 64 объектть арьсекшнетяма строямс педа-пес, тянкса эрявксты 2,7 миллиард цалковай», - мярьгсь Алексей Грибанов. Но Артём Здуновонь кизефксонц лангс, коста сявомс тя ярмакнень ашесть отвечав аф Минфинонь, аф Минстроень представительхне.
Ашезь получа ответ кабминонь члеттнень эзда региононь вятись и ся кизефксть лангс, мес аф путфт налоговай учетс 500 лама объектсь, конат строяфт, но аф сувафтфт тевс – тя марнек «недостройть» 40 процентоц. Шарьхкодеви ответ тянь лангс ашель и Мордовиянь имуществань и земельнай отношениянь Госкомитетть председателенц Алексей Фоновонь эзда. «507 объектсь, конат строяфт, нолявихть тевс, а налогт казнав аф повондыхть! Кие-бди синь пртцесыне, а меле муниципальнай образованиянь оцюнятне вешендихть ярмакт социальнай вешфкснень пяшкотькшнеманкса. Тя «недостройхне», улема, нолясазь тевс сембе жилищно-коммунальнай инфраструктурать, но тиендьсазь тянь договорфтома, лисенди. Кинь ярмаконзон вельде?» - макссь кизефкс региононь вятись и макссь поручения нюрьхкяня пингста максомс теенза информация тя ситуацияти туфталхнень и ответственнайхнень колга.
Артём Здунов отмечазе ся фактть, што правительствать лац-ряц аф ладяф работац может вятемс сянди, што апак строяк объекттнень аф удалай сувафтомс тевс эсь пингстонза, тяконь лувксса и сятнень, конат строявихть национальнай проекттнень мяльса кирдезь. Тя Идень республиканскяй больницять од хирургическяй корпусоц, идень саттне, китне. «Тинь васетькшнетяда аньцек монь кабинетсон, эсь еткова соткст аф кирнетяда?» - кизефтезень сон республиканскяй правительствань члеттнень, конат ульсть совещанияса. «Тя национальнай проект, а тинь фкя-фкянь лангс прят шукиетяда, мезевок аф содатада! Ванды пачфтеда сянь колга, кода карматама етафнемост эряфс проекттнень – семботь контракциять эзда сявомок средстватнень тевс нолдамаснонды молемс», - мярьгсь Артём Здунов строительствань, транспортонь и дорожнай хозяйствань министрти Виктор Цыгановонди. И макссь поручения сувафтомс практикас национальнай проекттнень пяшкотькшнемаснон коряс эрь недялянь правительственнай планеркатнень.
Март ковть пенцты правительствати максф поручения анокламс республикаса педа-пес апак строяк объекттнень лувксснон кирьфтаманц коряс сяда товолдонь план. «Кда тя объекттне эрявихть ломаттненди, лисенди, эряви строямс синь педа-пес!» - азозе Артём Здунов.
Мордовия Республикань Оцюнять пресс-службац