Лобаски велесь вятьсы эсь историянц 16 векста сявомок, эрзянь тя сире велесь касфтсь лама содаф ломань, синь лувкссост – Советскяй Союзонь Геройсь, генерал-майорсь Василий Здунов, эрзянь поэтсь Яков Кулдыркаев. И тячивок ломаттне, конатнень ункссна тя веленнет, аф юкснесазь родной аймакснон и койс коре сашендыхть тяза Тройцянь шиня.
Республикань Оцюнясь, самок ёмла родиназонза, васенцекс путсь панчфт Великай Отечественнай войнаса шавф воиттнень памятникснонды и лятфтазень синь минута кашт аф молезь ащезь.
Велень центральнай площадьса ётафтовсть народнай гуляният – тяса ульсь кода кулхцондомс творческяй коллектифнень выступленияснон, ваномс народнай промыслань и декоративно-прикладной творчествань выставкать. Козя мокшэрзянь крайсь асу ломаньца! Шуфтста керсемась, сюреса сёрмадомась, гончарнай маштомошись и ламось лиясь – семботь тянь ульсь кода аф аньцек няемс эсь сельмоса, но и варжамс тонадомс тянди мастер-класснень пингста.
«Кельгома землякт, сюкпря, мес тердемасть монь тя илати. Россияти кельгомась ушеткшни семьяти, ялгатненди, шачема-касома масторти кельгомаста. Сембе оцюсь ушеткшни ёмланяста, а марса минь – оцю вий! – мярьгсь Артём Здунов. – Тейне оцю честь тячи улемс марса мархтонт, родной Лобаски велень, родной Атяшевань, родной Мордовиянь ломаттнень мархта. Поздравляндатядязь тинь Россиянь шить, Святой Тройцять мархта, арьсян сембонди мир, шумбраши и цебярь эряф!»
Илать пингста чествондафтольхть велень труженикне. Мордовиянь Оцюнять, республикань Правительствать и районнай администрациять эзда казнетнень получазь АПК-нь работникне, учительхне, медикне, лама идень семьятне, од специалисттне.
Велеряйхнень стане жа поздравляндазень республикань Правительствать Председателец Владимир Сидоров и Ардатовскяй и Атяшевскяй епископсь Вениамин.
Корхтафоль велеть виияфнеманц колга. Райононь оцюнясь Виктор Прокин, земляконзон поздравляндамста, азозе, штос ай кизоня ушедови культурань дворецть петемац и Кулдыркаевонь ульцянц эзга кить строямац. Тяда башка, тяниень пингть мольфтеви 1 тёжянь пря потяви стаданди тяниень пингонь молочнай комплексть проектированияц. «Главнайсь – штоба велесь афоль шамонда, штоба ломаттне эряльхть и работальхть шачема-касома модать лангса!» - мярьгсь сон.
Официальнай пяльксть шумордамда меле Мордовиянь Оцюнясь корхнесь земляконзон мархта, ванозе, кода ётафтовихть вело- и мотогонщикнень показательнай выступлениясна.
Мордовия Республикань Оцюнять пресс-службац