Артём Здунов Рузаевкаса петемань-мазоптомань объекттнень эса: «Максода предпринимательхненди покодемс, а ломаттненди – парста ваймосемс!»

Артём Здунов Рузаевкаса петемань-мазоптомань объекттнень эса: «Максода предпринимательхненди покодемс, а ломаттненди – парста ваймосемс!»

15 сентябрьста Мордовиянь Оцюнять аф лама пингс тевонзон тиендисна Артём Здунов ванозень Рузаевкаса петемань-мазоптомань объекттнень – культурань и ваймосемань паркть, а стане жа Машиностроителень аллеять.

Культурань и ваймосемань парксь тядде петьфоль-мазоптфоль ёмла ошнень и историческяй поселениятнень эса эряманди цебярь вастонь тиемать коряс инь цебярь проектонь марнек Россиянь конкурсса прянц няфтемда меле.

Тяса полафтовсть якамань-шяямань кинятне, ладявсть нюряпт, эземнят, идень оцю площадка, петьф кизонь сценась. Стане жа ладяф видеонаблюдения. Паркть фкя инь оцю мазоптомбялец – шинь часттне, конат сембода оцюфт Россияса.

Артём Здунов шарфтсь мяль сянди, што тяса аф тяниень пингоннет аттракциоттне. Аймаконь оцюнясь Александр Сайгачёв азозе: администрациясь покоди тя кизефксть коряс, мольфтевихть корхнемат инвесторхнень мархта.

«Парксь оцю, цебярь. Няеви – строительхне покодсть лац. Но мон аф няян тяса мишендемань фкявок объект. Арьседа тянь коряс. Максода предпринимательхненди покодемс, а ломаттненди парста ваймосемс. Вов курок сай тялось, паркса улеза пси чай, кофе, пачанят или тянь лаца мезевок лия. Тясть персе бизнесть кинц, теенза вийс коре тиемс паркть сядонга цебярькс», - мярьгсь Мордовиянь Оцюнять аф лама пингс тевонзон тиендисна.

Машиностроителень аллеясь эвондась Рузаевкаса «Формирование комфортной городской среды» проектть вельде. Федеральнай бюджетсь нолдась строямань тефнень пяшкодеманкса пцтай 35 миллион цалковай. Тяса тифт якамань кинятне, ладяфт идень и спортонь площадкат, эземнят, арт-объектт. Нльне эвондась афкуксонь сцена. Петемань-мазоптомань тевть эзда шири ашезь ляда «Рузхиммаш» АО-сь.

Региононь вятись кизефнезень ошеряйхнень, мялезост-аф тифсь. Ломаттне азсть сюконямань валхт тяфтама казненкса, конань тяни лувондсазь микрорайонца инь цебярь вастокс.


Мордовия Республикань Оцюнять пресс-службац