«Рузаевецне няфтсть шарьхкодема и кирдезь Россиять решениянц шумордамс Украинать и Донбассть каршек ащемаснон. И тячи минь цёраньке аралакшнесазь Родинать, честь мархта пяшкотькшнемок эсь винскяй долгснон», - мярьгсь райононь руководительсь.
Райононь промышленнай предприятиятне лац шумордазь ётай кизоть — миф товархнень объёмснон, тиф работатнень и услугатнень коряс показательсь пяшкотьф 134 процентта — тя 50,6 миллиард цалковай. Марнек историянц пингста райононь сёронь касфнихне колмоцеда сатсть 100 тёжяньда лама тонна, кочкамок пцтай 105,5 тёжянь тонна сёра. 13 киза ни Рузаевскяй районць занцесыне васенце васттнень лофцть производстванц коряс — нолдаф 52 тёжяньда лама тонна, тя 11 процентта лама общереспубликанскяй объёмть коряс. Тя показательхнень сави нинге касфнемс. АПК-са показательхнень цебярьгофнеманкса райононь оцюнясь Александр Юткин путсь задача 2023 кизонди сяда активнайста нолямс тевс катф модатнень.
Азфоль, што лац мольфтевихть тефне инвестициятнень водендакшнемаснон коряс. Тя ширеть коряс кизоньберьфонь прогнозсь пяшкотьф 2,5-крда — основной капиталти нолдаф 1 миллиартта лама цалковай инвестиция. Тя лездсь панжемс 327 рабочай васта. Башка оцю путкссна тянди «Рузаевка» ТОСЭР-нь предприятиятнень-резиденттнень: сембе пингть мархтост панчф 1110 рабочай васта, инвестициятнень объёмсна пцтай 11 миллиард цалковай.
Меля шумордаф «Рузово» ЗАО-ть и «Агросоюз-Красное сельцо» ООО-ть инвестпроектснон омбоце этапсна. Тядде арьсекшневи ушедомс од инвестпроектт 2 миллиартта лама цалковаень питнес. Ушедови «Талина» ГП-нь сиволень продукциять коряс заводть и «Газомоторные комплексы» ООО-нь газомоторнай станциять строямасна. «Исток» агропредприятиять планонзон эса строямс животноводческяй комплекс. Целайнек 2023 кизоня инвестициятне районца кармайхть 1,8 миллиардта лама цалковай.
«Заработнай платать уровенец — эряфть качестванц сембода главнай показателец. Тяни райононь оцю и средняй предприятиятнень эзга сон арась средняйста 48 тёжянь цалковай. Тяка пингть ули кадрань аф сатнема, ламотне работайхть вахтовай методса. Минь сярьгятькшнесаськ инвесторхнень, панчсетяма од производстват, тиенттяма од рабочай вастт, петнесаськ-мазопнесаськ территориятнень. Эряви мрдафнемс эряеньконь родной масторснон лангс, эсь семьяснонды», - мярьгсь Александр Юткин.
Кизоньберьф районца строяф пцтай 28 тёжянь квадратнай метра эряма васта — прогнозсь пяшкотьф 153 процентта. Тя макссь ётафтомс ломаттнень 3,3 тёжянь квадратнай метрань площадьса аварийнай эряма вастста — од квартират получасть 168 ломанць. Тядде эрямань условияснон цебярьгофтьсазь 128 ломанць.
«Безопасные и качественные автомобильные дороги» нацпроектть мяльса кирдезь Мордовия Республикань Дорожнай фондть средстванзон вельде 2022 кизоня Рузаевскяй районца петьф 14 автомобильнай ки, тянкса карьхцяфоль пцтай 179 миллион цалковай. 2023 кизоня шумордави Рузаевкать Севернай обходонц строямац.
«Жильё и городская среда» проектть мяльса кирдезь 2022 кизоня капитальнайста петьфт кафта куд пирьфне, МР-нь Дорожнай фондть средстванзон вельде — нинге 8 куд пирьфт. «Формирование комфортной городской среды» программась лездсь петемс-мазоптомс меля нинге фкя общественнай пространства — Рузаевкаса велодромть территориянц. Тядде ули одкстоптф Красное сельцо велеса Центральнай площадсь. Эряфс ётафтови «Зелёная сцепка» проектсь — тиеви реконструкция Рузаевкаса Горшковонь ульцянц эзга бульварти.
Меля «Комплексное развитие сельских территорий» программась лездсь ётафтомс эряфс Рузаевскяй районца благоустройствать коряс 5 проектт — Татарская Пишля, Красный Клин, Сузгярьге, Мокшень Пишля и Аргамаково велетнень эса. 2023 кизоня сави ётафтомс эряфс нинге 12 проект.
Школатнень капитальнайста петемань федеральнай программать коряс работат пяшкотьфт 5№ школаса. Работатне мольфтевихть ни 73 школаса, Трускялень школаса, а стане жа тядде капитальнайста петеви Татарско-Пишленскяй школась. «Здравоохранение» национальнай проектть вельде поладовсь Филатовонь ульцянц эзга поликлиникать зданиянц ремонтоц, кона аделави тядде. Ушедовсь Идень поликлиникать строямац.
Азфоль, што здравоохранениянь районнай сфераса ули кадрань аф сатнема: Рузаевскяй ЦРБ-са ули вешфкс педиатрань, участковай терапевтонь, ФАП-нь фельдшеронь эса.
Кизоньберьфонь работань итокнень коряс Рузаевскяй районць занязе васенце вастть регионца культурань сферать виияфнеманц коряс. Капитальнайста петьф Приреченскяй клубсь, мольфтеви библиотекатнень одкстопнемасна, велень клупнень материально-техническяй базаснон кемокснемац.
Сессиять пингста эсь сатфксснон колга азондсть промышленнай предприятиятнень руководительсна — эрьсь эздост активнайста ётафни эряфс инвестпроектт. Нят «Рузхиммаш» АО-сь, «Конструкционные композиты» ООО-сь, «Рузово», «Экспонента» предприятиятне.
Сессияти итогонь тиемста Мордовиянь Оцюнясь Артём Здунов спасибась промышленникненди докладснон инкса и районть и республикать виияфнемаснонды путксонкса. Сон шарфтсь башка мяль финансовай сферати: «Кда шарфнемс сатомшка мяль производственнай кизефксненди и од проекттнень ширеснон кирдеманцты, мезть тинь лац тиендьсасть, тя лезды касфтомс бюджетть доходонзон, и тянь мархта — пяшкодемс ламоц социальнай обязательстватнень».
Китькстафоль, што районца касфтовсть налоговай дохоттне.
«Экология» нацпроектть мяльса кирдезь Рузаевкаса мольфтеви ташта свалкать рекультивацияц — Мордовиясь фкя инь васенце региоттнень ёткса, конат сувасть программати. Тянь вельде 2026 кизоти 7 гектархт модась мрдафтови состоянияс, кона кондясти велень хозяйствань тевонь вятеманкса.
Районца шумордавсь канализационнай коллекторть строямац, мезенкса районць получась 200 миллион цалковай «Содействие развитию инфраструктуры субъектов РФ» федеральнай проектть мяльса кирдезь.
Мордовиянь Оцюнясь китькстазе, што Рузаевкаса васенцетнень ёткса тиф «Движение первых» ячейка. Сон максси оцю возможностть од ломанень инфраструктурать виияфнеманц коряс, тя гранттне эрявихть нолямс тевс. Тядде арьсекшневи одкстоптомс Мордовиянь «Изумрудный» инь сире лагерть. Республикась сувась 16 пилотнай регионть лувксс — лагерсь васенцекс регионца примай участия иттненди ваймосеманкса и шумбрашиснон кемокснеманкса курокста строяви конструкциянь тиемать коряс федеральнай программати, мезсь лезды строямс тяниень пингонь кафта спальнай корпуст и касфтомс лагерьса васттнень 350-ц.
«Районць лисенди вииякшнемань цебярь темпс, командась вии, мяль работамс ули. Удаласт тевонте!» - меколи мярьгсь Артём Здунов.
Мордовия Республикань Оцюнять пресс-службац