21 октябрьста Мордовиянь Оцюнясь Артём Здунов ульсь «АВ InBev Efes» Саранскяень пивовареннай заводса. Региононь вятись содафтсь предприятиять производственнай виенц мархта и ванозе маршрутть, кона тиф тяса «Промышленнай туризма» ширеть мяльса кирдезь. Мархтонза экскурсияса ульсть МР-нь Правительствать Председателенц Васенце полафтыец Игорь Фрейдин и Мордовиянь финансонь министрть тевонзон тиендисна Сергей Тюркин.
Артём Здуновонди няфтьфтольхть Саранскяень пивовареннай и солодовеннай завоттнень покодемаснон результатонза. Марстонь покодемать вельде регионца тиф производственнай кластер, коса касфневи оцю качествань тозер, нолямок тевс мастор лангонь инь цебярь технологиятнень, тиендеви переработка и ноляви солод, а сяльде сон ноляви тевс пивовареннай продукциять производстваса. Тянь мархта сатневи региононь бюджетти налоговай пандоматнень сувафнемасна, а стане жа макссевихть покодема вастт лама ломаненди.
Мекольдень кизотнень ноляви продукциять лувксоц кирендсь. Тянь колга корхтафоль Мордовиянь Оцюнять и холдингонь вятихнень васедемаснон пингста, кона ульсь июнь ковста Петербургскяй международнай экономическяй форумса. Сафоль мяльс сяда товга вятемс марстонь покодема, а стане жа анокламс программа производствать касфнеманкса.
Артём Здунов мярьгсь: «Саранскяень пивовареннай заводсь – региононь фкя инь оцю налогонь паннись. Отрасляса покодихть сядот ломань, кадомс синь тевфтома аш кода».
"AB InBev Efes» предприятиять Саранскяень филиалонц исполнительнай директороц Евгений Унгер азозе: нинге мзярошка кизода тяда инголе предприятиясь рамсекшнезень клянцеконь сюлекатнень Рузаевкань клянцеконь заводса. Но мекольдень пингть сотрудничендамась лоткафтовсь. Тяни мольфтевихть корхнемат партнёронь соткснень эреклафтомаснон колга.
Стане жа пивовареннай предприятись арьсекшни нолдамс алюминиевай банкас симомбяльхнень кайсемаснон коряс линия. Тяфта, удалай ламода касфтомс продукциять лувксонц. Мордовиянь Оцюнясь мярьгсь МР-нь Васенце вице-премьерти Игорь Фрейдинонди вятемс марстонь работа компаниять мархта тя кизефксть пяшкодеманкса. «Кда ули кода касфнемс объёмтнень, тейнек аш кода аф тиемс тянь», - мярьгсь Артём Алексеевич.
Мордовия Республикань Оцюнять пресс-службац