19 апрельста Мордовиянь Оцюнять аф лама пингс тевонзон тиендисна Артём Здунов ульсь «Тепличное» АО-са. Генеральнай директорсь Александр Живаев азондсь региононь вятити предприятиять производственнай мощностензон и од энергетическяй проектонзон колга. Мекольдень колма кизотнень теплицатнень площадьсна касфтфтольхть пцтай 8,5 гектарда, строязь эсь электростанцияснон и котельнайснон. 2020 кизоня сембе объекттне лиссть проектнай мощностьс, мезсь макссь кочкамс теплицатнень эса 32 тежяньда лама тонна перень сера. Тяниень пингть теплицатнень площадьсна арась 31 гектар. Тядде сон касфтови нинге 8 гектарда, мезсь максы получамс дополнительна 7 тежятть тонна перень сера и панжемс од рабочай вастт.
Мордовиянь Оцюнять аф лама пингс тевонзон тиендисна корхнесь теплицань работникнень мархта. Региононь лидерти азондсть трудендамань условиятнень и инь цебярь сотрудникненди поощрениятнень колга. Рядовой составть заработнай платац целевой показательхнень сатомста может улемс 60 тежяньда лама цалковай. Артём Здунов мярьгсь, што тя цебярь уровень регионти, но сембе сяка, зарплатась должен фалу касфневомс.
Сембоц предприятияса трудендайхть 750 лама ломань. Продукциясь мишендеви Российскяй Федерациянь ламоц субъекттнень территорияса, Мордовияса лядонды 15 процентсна. 2020 кизонь итокнень коряс аналитическяй исследованиянь центрать мархта «Тепличное» АО-сь лувф «Отраслянь инь цебярь предприятиякс».
Мордовия Республикань Оцюнять пресс-службац