Мордовиянь Оцюнять аф лама пингс тевонзон тиендисна Артём Здунов 21 январьста етафтозе коронавируснай инфекциять профилактиканц и келемоманцты кить персеманц коряс оперативнай штабть заседаниянц. Корхтафоль тяниень эпидемиологическяй обстановкать, здравоохранениянь региональнай системать работанц, ковидть эзда вакцинациять, медицинскяй работникненди стимулирующай выплатань пандомать, санитарно-эпидемиологическяй вешфкснень мельге контрольть колга.
Кода пачфтезе вице-премьерсь Галина Лотванова, мекольдень кафта недялятнень республикаса ковидть мархта ситуациясь цебярьгодсь: коль кири урмаямань эрь шиня лихневи случайхнень лувкссна, касонды апак заняк лядонды койка-васттнень лувкссна – тяниень пингть сон арась 34,5 процент.
«Мекольдень колма недялятнень госпитализациятне кирсть 24 процентта, и тячиень шити минь кирьфтаськ инфекционнай коечнай фондть 180 вастта. Тяни, кадондомок апак заняк койкатнень, тейнек эряви ушедомс реабилитацияснон сятнень, кие сярядсь коронавируснай инфекцияса. Маластонь пингть минь ушеттама панчсема реабилитационнай койка-вастт республиканскяй госпитальть и республикань лия медучреждениятнень видеса», - мярьгсь вице-премьерсь.
Мордовиянь Оцюнять аф лама пингс тевонзон тиендисна китькстазе, што ковидть каршес тюремаса васенце вастти тяниень пингть лихневи ломаттнень вакцинациясна. «Странань Президентть поручениянц коряс 18 январьста сявомок, кода тинь содасасть, сон арась массовайкс, - азозе Артём Алексеевич. – И тяса тейнек пяк важна тиемс семботь маштозь, аф нолддамс очередень пуромомать прививочнай пункттнень эса, обеспечендамс населениять информированиянц и тиемс эрявикс инфраструктура».
Тяниень пингть прививочнай кампаниять етафтоманцты анокт 40 стационарнай и 17 выездной пункттне. Маластонь пингть республикав поступай вакцинань 27100 комплект – тя максы ушедомс масштабнай вакцинациять сембе группатненди, конат азфт Россиянь Минздравть мархта кода васенце уровенень приоритетт: тя здравоохранениянь, образованиянь, социальнай обслуживаниянь, многофункциональнай центрань работникне, ломаттне, конат эряйхть социальнай обслуживаниянь учреждениятнень эса, кинь улихть ваймонь тарксема кинь, сердечно-сосудистай системань хроническяй урмасна, кит муцсихть сахарнай диабетса, куялгодомаса. Лятфтасаськ, што республикаса прививкат тифт ни 2742 ломанти. Кода пачфтезе С.В.Катковонь лемса больницянь поликлиникать заведующаец Юлия Шеволаева, вакцинась примави лац.
Республикань вятись шарфтозе МР-нь информатизациянь и связень министрть Игорь Вольфсононь мяленц сянди, што эряви обеспечендамс сянь, штоба ломаттненди улель кода серматфтомс прививкас госуслугань порталть вельде.
Мордовия Республикань Оцюнять пресс-службац