Артём Здунов: «Святой праведнай воинть Феодор Ушаковонь канонизацияста 20 кизонь топодемась – Мордовияса тя кизонь фкя инь васенце илась»

Артём Здунов: «Святой праведнай воинть Феодор Ушаковонь канонизацияста 20 кизонь топодемась – Мордовияса тя кизонь фкя инь васенце илась»

4 августста Мордовиянь Оцюнять аф лама пингс тевонзон тиендисна Артём Здунов примась участия торжественнай пуромкснень эса, конат лемтьф святой праведнай воинть Феодор Ушаковонь канонизацияста 20 кизонь топодемати и конат ня шитнень ётафтовихть Темниковань аймакса и Саранскяйса. Илас сашендсть Россиянь ВМС-нь, духовенствань, а стане жа эрь кодама ошста мокшэрзянь землячестватнень представительсна.

МР-нь Оцюнять аф лама пингс тевонзон тиендисна делегациять мархта марса путсь панчфт апак сяськ флотоводецть памятниконцты, кона ащи Темниковань фкя площадьса. Тя вастса маластонь пингть ули строяф святойть лятфнеманкса часовня. Тяса 200 кизода тяда инголе ащесь Спасо-Преображенскяй соборсь, коса ётафтфоль отпевания адмиралти.

Темниковань культурань дворецса ульсь «Морская душа» патриотическяй моронь фестивальть гала-концертоц. Артём Здунов лятфтазе ваныхненди, што тематическяй мероприятиятне, конат лемтьфт флотоводецть канонизациянцты, ушедовсть январь ковста сявомок и кармайхть мольфтевома кизоть аделавомс. «Святой праведнай воинть Феодор Ушаковонь канонизацияста 20 кизонь топодемась – республикаса тя кизонь фкя инь васенце илась. Апак сяськ адмиралсь калмаф мокшэрзянь масторса. Минь задачаньке маластонь пингонди -  тиемс тя васттнень марнек Россияти козяшикс. Карматама пачфнемост тяза кадеттнень. Сави петемс-тиемс райононь инфраструктурать, штоба аймаконь эряйхненди и инжихненди улель тяса пара», - мярьгсь Артём Здунов.

Россиянь Военно-морской флотть главнокомандующаенц полафтыец Владислав Павлов китькстазе, што Феодор Ушаков – морякненди эсь лацонь и пяк питни святой, конань колга содай эрь военнайсь и эрь курсантсь. Сон вестевок апак сяськтоль, фкявок матроссь ашезь пов пленц. Тя минь историяньке, кона тейнек ванфтома. Марнек сонь эряфоц – тя цебярь пример Родинати служамаса. Ушаков фкя и сяка флотоводецсь, кона сувафтф святойхнень лувксс. Тейне оцю честь улемс тячи тя священнай модать лангса», - мярьгсь сон.

Концертта меле инжихне ульсть тястонь краеведениянь музейса, коса ванозь историческяй экспонаттнень, тяконь лувксса апак сяськ адмиралть  личнай паршиензон.


Мордовия Республикань Оцюнять пресс-службац