Артём Здунов 12 январьста етафтсь рабочай васедема Теньгушевскяй райононь оцюнять Ольга Куткинать мархта, ванондовсть территориять социально-экономическяй виияфнеманц коряс кизефксне. Васедемаса стане жа примась участия Теньгушевскяй райононь Шокшинскяй велень поселениянь оцюнясь Павел Акишев.
Васедемать панжемста, республикань вятись азозе, што Теньгушевскяй районць ащи пограничнай и стратегическяй территориякс республикати, и пяк важна максомс муниципалитетти эрявикс лезкс.
«Аф кунара пара мяльса ваныне Васенце каналса Шокша велеть колга сюжетть, - мярьгсь Артём Здунов. – Мялезе эсь эздонт содамс, кодама стакат-сталмот улихть районца и велеса, мезьса теенть эряви лездомс».
Ольга Куткина азозе, што Теньгушевскяй районца эряйхть 9,5 тежянь ломань – тя сисем велень поселеният. Трудоспособнай населениясь – 5,5 тежянть малава ломань, эздост 2 тежятть ломанть аш работасна, теест сашендови якамс ярмаконь добувама вахтовай методса Москуву.
«Ся, што миньцонк аш рабочай вастт – тя фкя инь васенце прябаланьке», - китькстазе райононь оцюнясь.
Артём Здунов кизефнесь территориять потенциальнай возможностензон, инвесторхнень мархта райононь администрациять работанц, производства алу площадкатнень анокламаснон колга. Тяконь лувксса республикань вятись лоткась районца 3 тежятть оцю сюра жуватанди молочнай комплексть строяманц коряс российско-венгерскяй марстонь проектть лангс. Пандемиять сюнеда сонь эряфс етафтомац мольфтеви аф сяшкава вишкста, кода арьсекшневсь, Артём Алексеевич макссь поручения республикань Минсельхозти сявомс кизефксть башка контроль алу. Ванфтольхть и лия производственнай проекттне, конатнень ули кода етафтомс эряфс районца.
Республикань Оцюнять аф лама пингс тевонзон тиендисна башка китькстазе, што Теньгушевати аш важнай и аф важнай ширет: сембось, мезсь сотф населениять занятостенц мархта, эряви тонафнемс и етафнемс эряфс. Васендакиге корхтамась мольфтеви народно-художественнай промыслатнень виияфнемаснон колга. Теньгушевскяй умелецне занцихть пря шуфтонь матрешкань тиемаса и мазоптомаса, эсь продукцияснон прважсесазь Москуву, но пандемиять сюнеда, кода азозе Ольга Куткина, вешфкссь теест прась. Республикань вятись азозе, што эряви лисендемс мишендемань интернет-площадкатненди, конат пяк курокста арсихть келиста содафокс. Тя цебярь возможность народнай умелецненди получамс стабильнай доход и виияфнемс эсь ремесласнон.
«Народнай промыслатне эрявихть ванфнемс и виияфнемс, эрьда нинге варжасаськ кирдемс тя направлениять ширенц Россиянь Минпромторгть линиянц коряс, грантонь системать вельде», - мярьгсь Артём Здунов.
Районца уликс прябалатнень еткса азфоль кой-кона населеннай пункттнень эса ведть кальдяв качествац и ульцятнень аф сатомшка валдоптомасна, тратуархнень аф эсь пингстонза чистендакшнемасна. Ольга Куткова азозе: кда корхтамс ведть качестванц колга, тяса решандамс прябалать эсь вийсонза районти аф удалай, эряви республиканскяй власттнень лезкссна. Артём Алексеевич макссь поручения крхкаста содафтомс тя кизефксть мархта, кочкамс кит-ятт решандаманксонза.
Васедемаса башка корхтафоль Шокша велеть виияфнеманц колга. Велень поселениянь оцюнясь Павел Акишев азондсь сянь колга, кода шачсь мяльсь водендамс вели ломаттнень. 2016 кизоня тя инициативать мархта лиссь Шокша велеса шачф-касф церась Дмитрий Шиндаков, конац социальнай сетьтнень вельде ушедсь тернемост тяза ошеряйхнень. И синь усковсть – 3,5 кизоста Шокшав састь 12 семья – тя 32 ломань. А Васенце каналса аф кунара няфтьф сюжетта меле, Павелонь валонзон коряс, ушедсь афкуксонь ажиотаж – ломаттнень эзда гайфтемада арась ламонь-крда сяда лама.
Артём Алексеевич кирдезе Дмитрий Шиндаковонь и Павел Акишевонь инициативаснон ширенц и эняльдсь азомс ширетнень, конатнень коряс велети эряви лезкс. Велень поселениянь оцюнясь азозе: эрявихть полафтомс водоснабжениянь сетьтне и од кит. Республикань вятись макссь поручения ваномс сембе возможносттнень ня прябалатнень решандаманкса, тяконь лувксса государственнай программатнень вельде.
«Теньгушевскяй району мон маластонь пингть саян, тяконь лувксса ванца Шокша велетьке. Карматама мархтонт работама и лезнема теенть», - мярьгсь Артём Алексеевич.
Мордовия Республикань Оцюнять пресс-службац