Мордовиянь Оцюнять аф лама пингс тевонзон тиендисна Артём Здунов 30 апрельста, Тундань и Трудонь илать карша, макссь знамят трудовой соперничествань конкурсонь сяськихненди. Койс коре пялькстомась мольфтеви промышленностень, строительствань, торговлянь, транспортонь, связень, емла предпринимательствань, агропромышленнай комплексонь, образованиянь, здравоохранениянь и культурань отраслятнень эса.
Сяськихнень приветствондамста, республикань вятись отмечазе, што трудовой соперничествань конкурссь – Мордовиять фкя инь цебярь коец. «Тячи минь чествондасаськ профессионалхнень, профессияс коре инь цебярьхнень. Тинь – минь гордостень маряма вастоньке! Спасибан теенть сянкса, што аф ваномок сембе стакатнень-сталмотнень лангс, тинь няфнесасть эсь маштомошинтень. Тинь ащетяда серьезнай конкуренциянь условияса, но, аф ваномок тянь лангс, нолятада цебярь товархт, макссетяда инь цебярь услугат, касфнесасть прибыльть, паннетяда налогт, конат нолявихть республикать виияфнеманкса и социальнай вешфкснень пяшкотькшнеманкса. Профессионалхненди фалу кармай макссевома оцю питне любой тевса. Мон арьсян теенть сетьме менель вельхксонт, пара тефт и трудовой ялгаксши», - мярьгсь Артём Здунов.
Региононь вятись азозе, што Мордовиясь арси рабочай профессиянь чемпионатонь активнай участникокс. «Ули предложения, штоба Саранскяйсь араль минь странасонк рационализациянь и изобретательствань центракс. Минь етафтоськ васенце съездть и сявоськ эсь лангозонк тя пилотнай функциять. Минь карматама кирнемонза Ворлдскилс движениять ширенц», - китькстазе МР-нь Оцюнять аф лама пингс тевонзон тиендисна.
Конкурсть рамкаса сявондевсь мяльс предприятиятнень-участникнень мархта максф услугатнень объемсна, выручкасна, продукциять ассортиментоц и, конешна, средняй заработнай платась. Сяськихнень еткса аф аньцек региононь инь оцю компаниятне, но и, кепотьксонди, Старошайговскяй районцта «Колобок» пекарнясь. Миф продукциять объемонза меля арасть 56 миллионда лама цалковай, ассортименць кассь 233 процентта, а средняй заработнай платась арась 27 тежянь цалковай. «Колобок» ООО-сь, «Тепличное» АО-сь, «ТРАНС-СЕВЕР» АО-сь получасть Артём Здуновонь эзда знамя сембе пингс ванфтоманди, сяс мес арасть труовой соперничествань сяськикс колма кизот мельцек.
Чествондазь тячи и Гусефнень трудовой династияснон. Синь работайхть «Ковылкинскяй электромеханическяй заводса», а марстонь семейнай стажсна арась 163 киза. Династиянь оцюняти Иван Викторович Гусевонди региононь вятись макссь почетнай диплом и «МР-нь инь цебярь трудовой династиясь» знак. Династиянь эрь членти пандови премия – 1000 цалковай работаф эрь кизонкса.
Артём Здунов поздравляндазень конкурсанттнень сяськома, малаткшни илатнень мархта и арьсесь етафтомс майскяй ваймама шитнень семьяснон и мала ломаньцнон еткса, апак юкснек тяка пингть санитарно-эпидемиологическяй вешфкснень колга.
Мордовия Республикань Оцюнять пресс-службац