Россиянь Правительствать Председателенц полафтыец Дмитрий Чернышенко ётафтсь рабочай васедема Мордовиянь Оцюнять Артём Здуновонь мархта. Синь корхтасть регионть социальнай и экономическяй виияфнеманц колга.
Тяконь лувксса, няфтьфоль Мордовиять туристическяй уликсшиц. Вице-премьерсь азозе: тя отрасляти ули кода арамс экономикань виияфникс.
«Мордовияса улихть эсь лацонь вастт, конатнень арьсекшневи сувафтомс «Арзамас-Дивеево-Саров» паломническяй кластерти. Тяда башка, тяса улихть эсь лацонь культурнай объектт, конатнень пара мяльса ванондсазь туристтне. Мордовиясь республикатнень эзда васенцекс кемокстась соглашения «Туризм.РФ» корпорациять мархта. Сяда лама ломаненди тяни ули кода няемс эсь лацонь культурнай, природнай васттнень, конат тяса улихть», - мярьгсь Дмитрий Чернышенко.
Кода азозе Артём Здунов, регионца ушедовсь «Саранск-Темников-Санаксарь» кластерть тиеманц коряс проектть эряфс ётафтомац. Тя кармай маршрут, кона лемтьф адмиралти Ушаковонди. Сон арай пяльксокс «Арзамас-Дивеево-Саров» паломническо-туристическяй кластерти.
«Тя проектть мяльса кирдезь арьсекшневи тиемс реконструкция Санаксарскяй монастырти, коса ванфтовихть адмиралть мощанза, тиеви тяниень пингонь культурно-просветительскяй комплекс сонь лемсонза, а стане жа тиеви реконструкция Темников ошть историческяй строяфксонзонды».
«Кластерть виияфнеманц мяльса кирдезь арьсекшневи тиемс или петемс туристическяй инфраструктурань пцтай 35 объект. Надиятама, што тя проектть вельде туристтнень лувкссна кассы, кизоньберьф тяза кармай сашендома аф 50, а 250 тёжянь ломань», - китькстазе Дмитрий Чернышенко.
«Туризм и индустрия гостеприимства» национальнай проектть мяльса кирдезь вице-премьерть пингста Республикань Кудса кемокстафоль туристическяй инфраструктурать виияфнеманц коряс соглашения Мордовиять и «Туризм.РФ» Корпорациять ёткса. Кядьснон кагодть алу путозь Корпорациять генеральнай директороц Сергей Суханов и республикань Оцюнясь Артём Здунов.
«Туризмань сфераса минь оцю уликсшиньке касондоманкса, тяса минь мзярс аф сатомшка покоттяма, - китькстазе Артём Здунов. – Ся, што минь араме партнёркс «Туризм.РФ» Корпорациять мархта, - тя оцю аськолкс инголи тейнек. Тя лезды лихтемс отраслять од уровеньц».
Мордовия Республикань Оцюнять пресс-службац