Артём Здунов: «Тяфтама аф уленди, штоба кемотть миллиардсь коза-бди тульхть, а кивок аф мувору!»

Артём Здунов: «Тяфтама аф уленди, штоба кемотть миллиардсь коза-бди тульхть, а кивок аф мувору!»

Мордовиянь Оцюнять аф лама пингс тевонзон тиендисна Артём Здунов 25 январьста примась участия Мордовия Республикань судьятнень итоговай коллегиясост. Региононь вятись, панжемок заседаниять, лятфтазе, што Россиянь Президентсь В.В.Путин судьятнень всероссийскяй совещаниясост азозень задачатнень, конат ащихть судейскяй корпусть инголе. Тя ломаттненди правосудиять доступностенц касфнемац, судьятнень работаснон панжадокс тиендемац, единообразнай судейскяй практикать пуроптомац, судьятнень лангс прашенды сталмоть фкя лаца явомац.

«Пандемиянь стака пингть судебнай системась работась тапорксфтома. Сатомшка азомс, што меля ванфоль сяда лама тевда 2019 кизоть коряс (130 тежяньда лама). Ломаттне и бизнессь сяда сидеста кармасть пшкятькшнема судебнай араламанкса – тя кемокснесы судебнай процедуратнень лангс надиямать касондоманц и ломаненьконь правовой дисциплинированностьснон», - азозе Мордовиянь Оцюнять аф лама пингс тевонзон тиендисна.

Ашезь ета Артём Здунов и прябалатнень вакска, конатнень мархта васетькшни республикань судебнай системась. Тя мировой юстицияс коре республиканскяй бюджетть кредиторскяй шумоц, а стане жа мировой судьятнень работамань условиясна.

«Минь няйсаськ, што шумотне касондсть лов поколь лаца, республикань правительствати эрявсь мезе-бди тиемс тянь мархта, арьсемс тя ситуацияста лисемань план. Но мон афолень мярьге, што средстват аш, - китькстазе Артём Алексеевич. – Минь тяниень пингть ванондсаськ, коза правительствань руководствать мархта тиендевсть тя средстватне, сяс мес синь республикав пачфневсть. Тяда башка, сявондевсть оцю кредитт. Тяка пингть ЖКХ-ть и судебнай системать коряс бюджетть оцюфт шумонза. Карматама сотцемонза, и мзярда очередсь пачкоди правосудиянь оргаттненди, эняльдян судейскяй корпусти сяда внимательнайста маладомс тянди. Сяс мес кой-коста лисенди: ломанць бта наказаф, а средстватне аф мрдафневихть. А тя ярмакне сявфт народнай хозяйстваста, тя налогонь паннихнень ярмаксна! Тяфтама тефт, койсон, кармайхть: аф уленди тяфта, што кемотть миллиардсь коза-бди тусть, а кивок аф мувору!»

Республикань вятись надияфтсь, што материально-техническяй обеспечениянь и мировой судьятнень работама вастонь условияснон коряс кизефксне кармайхть решандакшневома этапонь этап. Но нолямс ситуациятнень, мзярда судьятненди пяле мархта ков ашель кода прважамс лихтьф судебнай решениятнень, сяс мес ашельхть средстват почтовай маркань рамаманкса, - аш кода.

«Тянь коряс монь мялезе маластонь пингть кулхцондомс республикань юстициянь министрть мялензон-арьсеманзон и сонцень Правительствать – мес эвондась тяфтама ситуация шумоть мархта, - мярьгсь Артём Алексеевич. – Карматама ваномонза мес тяфта лиссь. Эстокиге решандамс сембе прябалатнень, конешна, аф удалай, но минь должен улемс планоньке, коса азфт кизефксне, конатнень аш кода кадондомс одувонди. Спасибан судейскяй корпусти профессиональнай работанкса. Арьсян теенть сатфкст и сембе цебярть».

2021 кизоня судебнай системать задачанзон колга коллегиять заседаниянц пингста пачфтсь Мордовия Республикань Верховнай Судть председателенц тевонзон тиендисна Алексей Лушкин.

 

Мордовия Республикань Оцюнять пресс-службац