Артём Здунов 17 апрельста Дубенскяй району рабочай поездканц пингста ульсь Ардатово велеса, коса ванозе социальнай центрать работанц, кона строяф «Устойчивое развитие сельских территорий» программас коре. Тя проектть мяльса кирдезь Ардатовскяй велень поселениять территорияса 2017-2018 кизотнень строяфт стане жа спортивнай площадкат, петьф-мазоптф парковай зонась, етафтфт коммуникацият (газ, ки, водопровод) од ульцять эзга.
Социальнай центраса ащихть велень поселениянь администрациясь, фельдшерско-акушерскяй пунктсь, велень библиотекась, музыкальнай и кштимань класст, музей, велень клуб 160 вастонди актовай зал мархта. Клубть видеса етафневихть концертт, лама ломанень пуропни мероприятият, интересс коре клубт, дискотекат, конкурст. Кода пачфтезь республикань вятити, Ардатово велети гордостень маряма вастокс ащихть «Эрзянь ава», «Лейне» фольклорнай ансамбльхне, конат примсихть участия «Шумбрат, Мордовия!» фестивальса.
Мордовиянь Оцюнять аф лама пингс тевонзон тиендисна корхнесь художественнай самодеятельностень участникнень мархта, тяконь лувксса од артисттнень мархтовок, макссь оценка народнай умелецнень маштомошиснонды, содафтсь национальнай кухнять эсь лацонь ширензон мархта. Тяконь лувксса республикань вятить каванязь «вармазейда» - постнай шапаксста нармонь лаца тиф цюкорняда, конат койс коре аноклакшневихть Великай постть пингста. «Вармазейхнень» эса, сире койс коре, кудазораватне пртцихть «секретт». Синдемок цюкорнять, Мордовиянь Оцюнять аф лама пингс тевонзон тиендисна мусь потмосонза монета. «Лисенди республикати кизось кармай цебярь!» - мярьгсть велеряйхне.
Мордовия Республикань Оцюнять пресс-службац