Артём Здунов ульсь региоттнень эса уголовно-исполнительнай системань исправительнай центратнень лувксснон касфнемаснон мархта сотф кизефкснень коряс совещанияса

Артём Здунов ульсь региоттнень эса уголовно-исполнительнай системань исправительнай центратнень лувксснон касфнемаснон мархта сотф кизефкснень коряс совещанияса

24 ноябрьста Мордовиянь Оцюнясь Артём Здунов ВКС-нь режимса ульсь региоттнень эса уголовно-исполнительнай системань исправительнай центратнень лувксснон касфнемаснон мархта сотф кизефкснень коряс совещанияса, конань вятезе Россиянь юстициянь министрсь Константин Чуйченко. Республикань вятись корхтась пуромксса Мордовияса исправительнай центратнень лувксснон касфнемаснон колга. 

Эсь корхтамасонза Константин Чуйченко лятфтазе: Российскяй Федерациянь Безопасностень Советсь мярьгсь региоттненди 2024 кизоть самс касфтомс исправительнай центратнень лувксснон, штоба пяшкотькшнемс уголовнай наказаниять вихца покодемас водендамать вельде. Министрть валонзон коряс, тя лезды кирьфтамс  исправительнай учреждениятнень эса кирдевихнень лувксснон.

«Вихца покодемати ётамась лезды судендафненди мрдамс цебярь эряфти. Тяни ни минь няйсаськ, што исправительнай центрада меле одукс тиендеви преступлениятнень лувкссна нилень-крда сяда кржа», - китькстазе Чуйченко.

Юстициянь министрсь шарфтсь мяль: региоттненди исправительнай центратнень панчсемасна – оцю лезкс покодема вастонь аф сатнемань прябалать машфтоманкса кода предприятиятнень эса, стане и ЖКХ-нь сфераса.

Арьсекшневи, што 2022 кизоня исправительнай центратнень эса панжеви пцтай 20 тёжянь васта вихца покодемас судендафненди эряманди и покодеманди – пцтай 400 рабочай васта эрь регионца. А 2024 кизоти марнек странаса исправительнай центратнень эса тяфтама вастта эвондай 80 тёжянь.

Артём Здунов азозе: Мордовиясь эрьгавста поладсь тя тевти. Колмоце кизось 8-це  колониять-поселениять видеса покоди башка участка, коса трудендайхть 43 судендафсь. Покодемань 50 васта панчф «Ромодановсахар» предприятиять видеса. Сяда тов лувксснон арьсекшневи касфтомс кафтонь-крда.

Мордовиянь Оцюнясь азондсь исправительнай центратнень панчсемаснон коряс проекттнень колга, конат аноклавихть сувафтомс тевс – покодемань 50 вастонди башка участка Зубово-Поляна аймаконь Вышинскяй деревообрабатывающай комбинатса.

Стане жа арьсекшневи панжемс башка участка Саранскяйса, кочкаф ни 655 кафтонзаф метрань площадьса здания. Кой-кона предприятиятне азсть ни мяль марса ётафтомс эряфс тя проектть. Артём Здунов мярьгсь тя тевса заняф ломаттненди тонафнемс тяфтама центрань панчсемать коряс лия странатнень инь цебярь практикаснон.

Мордовия Республикань Оцюнять пресс-службац