Артём Здунов ульсь Саранскяйса школать видеса лагерьса

Артём Здунов ульсь Саранскяйса школать видеса лагерьса

Мордовиянь Оцюнять аф лама пингс тевонзон тиендисна Артём Здунов 9 июньцта марса Стратегическяй инициативань агентствать генеральнай директоронц заместителенц Дмитрий Глушконь мархта ульсь Саранскяень 24№ школать видеса лагерьса, коса шабатне ащекшнихть шитемба. Республикань вятись корхнесь педагокнень и синь воспитанникснон мархта, макссь оценка условиятненди, конат тифт школьникненди ваймосеманкса и тонафнеманкса.

Тяниень пингть республикаса школатнень видеса работайхть 299 лагерь, 55 лагерсь еткстост – Саранскяйсот. Сембе синь кармайхть работама 3 июньцта сявомок 28 июнти молемс. Эрь лагерти аноклаф тематическяй программа, арьсефт мастер-класст, интерактивнай урокт, экскурсият, тематическяй васедемат – тифт сембе эрявикс условиятне, штоба иттне кизонь каникулатнень пингста аф аньцек ваймосельхть, но и получальхть эрявикс маштомошит, варжалезь вийснон од тевса и, шять, кочкальхть эстеест сай пингонь профессия.

24№ школань директорсь Сергей Сурайкин азозе республикань вятити, што образовательнай учреждениясь етафни эряфс колма тематическяй направленият: кялень, спортивнай и экологическяй. Эрьти сувсихть аф фкя лацонь образовательнай площадкат: тя робототехникать, шахмататнень коряс занятият, экоквестт, викторинат и, конешна, спортивнай мероприятият.

Мордовиянь Оцюнять аф лама пингс тевонзон тиендисна ванозень лагерень сембе образовательнай площадкатнень, корхнесь шабатнень и педагокнень мархта. «Белая ладья» шахматнай клубть занятиянзон пингста республикань вятити азондсть иттнень сатфксснон колга – спортонь тя видть коряс 24№ школась ащи лидеркс Мордовияса. Артём Алексеевич корхнесь Мордовиянь чемпионть, котоце классонь тонафнить Егор Гавричевонь мархта. Аф ваномок сянь лангс, што сон нинге ефси шаба, сонь ули ни шахмататнень коряс омбоце оцювонь разрядоц. Аф лядондыхть стирнятневок – школась маряй гордость шахматисткатнень сазорхнень София и Кира Марычеватнень инкса.

Стане жа Мордовиянь Оцюнясь ульсь робототехникать, космость, перьфпяльть тонафнемаснон коряс занятиятнень эса – сембе вастова няевсь, кодама оцю интерес мархта школьникне сатнесазь од содамошитнень. А кялень группать занятиясост Артём Алексеевич оцю мяльса корхтась шабатнень мархта английскяй кяльса – сонь республикань вятись содасы пяк лац. Шабатне васенда аф ламода талакодсть, но меле пара мяльса ушедсть отвечакшнема Мордовиянь Оцюнять кизефксонзон лангс.

Оцю мяль лагерьса шарфневи спортти – Артём Здунов васетькшнесь од самбисттнень мархта, ванозе, кода етнихть синь занятиясна, корхнесь Мордовия Республикань самбонь Федерациять президентонц Владимир Трушкинонь мархта спортонь тя видть виияфнеманц колга. Тяда башка, Мордовиянь Оцюнять аф лама пингс тевонзон тиендисна ванозе столовайть – шабатне школать видеса лагерьса андовихть шити колмоксть.

Школань директорть Сергей Сурайкинонь мархта Мордовиянь Оцюнять аф лама пингс тевонзон тиендисна корхтась образовательнай учрежденияса шабатнень аф пелезь улемаснон обеспечендаманц колга.


Мордовия Республикань Оцюнять пресс-службац