«Сентябрть ушетксста минь улеме бизнес-миссия мархта коллеганьконь ширеса, пачфтеме тоста лама контракт, тяни мольфтеви работа предприятияньконь ёткса, ушедсь касфневома товарооборотсь. Минь задачаньке — виияфтомс межрегиональнай сотрудничендамать. Тячи минь няфтьсаськ коллеганьконди минь промышленнай потенциалоньконь. Кеман, ладявихть од соткст. Минь шарфнетяма мяль стака машиностроениянь лидерть - «Рузхиммашть» мархта сяда маластонь кооперацияти. Минь улихть заводоньке, конат заняфт металообработкаса, синь стане жа анокт сотрудничендамати. Промышленностьта башка шарфнетяма мяль велень хозяйствати. Арьсекшнетяма сявомс молочнай животноводствать виияфнеманц коряс республикать опытонц. Лувондса, што эряви арьсемс работань сембе ширетнень коряс марстонь тевонь вятемань план», - мярьгсь Алексей Русских.
Мордовиянь Оцюнясь китькстазе, што республикати Ульяновскяйть мархта сотрудничендамань перспективнай ширекс ащихть промышленностсь, велень хозяйствась, туризмась и культурась. «Аньцек меля Ульяновскяй области миф продукциять объёмонза касфтовсть котонь-крда. Минь лама соглашениядонк — марстонь лувкссна 14 миллиард цалковаень питнеса, тяддеть коряс стане жа ули касома. Тя и велень хозяйствась, и автокомпонентнай базать коряс ширесь. Ся предприятиятне, конатнень эса минь тячи улеме, кочкафт аф стак — минь мяленьке ладямс и кемокстамс соткснень. Кой-кона предприятиятне сувсихть оцю холдингс. Сембода главнайсь, што минь региононьке ащихть маласа фкя-фкянди — логистикась шарьхкотьф, специалисттнень ёткса ладявсть соткст. Минь задачаньке — арамс сядонга малакс. Киза работамста минь няфтеськ, што можна ламонь-крда касфтомс сотрудничендамать. Тяниень пингть тейнек ули кода пуроптомс марс виеньконь и лездомс фкя-фкянди партнёронь вешендемаса. Туристическяй тевть коряс стане жа улихть цебярь предложеният», - мярьгсь республикань руководительсь.
Мордовиянь делегациять составса, Правительствань членда башка, ульсть 35 промышленнай предприятиянь представительхне. Республикать потенциалоц няфтьфоль круглай шрать пингста, коса шарьхкотьфтольхть межрегиональнай кооперациянь сембе ширетне.
Мордовия Республикань Оцюнять пресс-службац