Васедемась ульсь Республикань Кудса. Эсонза участия примасть вице-премьерсь Галина Лотванова и МР-нь социальнай защитань, трудонь и населениять занятостенц коряс министрсь Игорь Князьков.
«Мялезе седи ваксста спасибамс лама идень сембе семьятненди тинь оцю трудонтень инкса», - мярьгсь Артём Здунов. – Тинь сяводе эсь лангозонт оцю ответственность. Шарьхкотькшнеса, мзяра тевда оцю семьяса, кодама стака теенть, но эняльдян, штоба тефне афольхть шорсе теенть корхнемс шабантень мархта. Корхнеда сянь колга, мезе тиендеви мирса, мезе ульсь лама кизода инголе. Тейнек важна, штоба иттне касольхть афкуксонь ломанькс, штоба кельголезь эсь семьяснон и Родинаснон. Тя минь тинь мархтонт марстонь задачаньке. Тинь пяшкодесть и вельф пяшкодесть эсь демографическяй программантень, сюкпря теенть тянкса, тяни тевсь минь мельганк».
Мордовияса пцтай 8 тёжятть лама идень семья, коса касфтови 25 тёжяньда лама шаба.
25 майста Россиянь Президентсь Владимир Путин Государственнай Советть президиумонц заседанияса, кона лемтьфоль социальнай ширень кирдемань кизефксненди, китькстазе, што лама идень семьясь должен улемс примеркс сембе обществати, ширец кирнема государствати.
Федеральнай и республиканскяй бюджеттнень средстваснон вельде Мордовияса социальнай ширень кирдемань мератнень получсесазь шаба мархта пцтай 60 тёжянь семьясь. Сяда оцю значения мархта мератне сувафтовсть «Демография» нацпроектонь «Финансовая поддержка семей при рождении детей» региональнай проектти. Тяфта, республиканскяй тядянь капиталсь, кона макссеви колмоце и сяда лама шабань шачфтомста, васенце шабати эрь ковонь пандомась, колмоце и сяда лама шабань шачфтоманкса эрь ковонь пандомась. Нинге фкя мерась – тя Ашу семьятненди, коса касфтовихть 3 колма кизоста сявомок 7 кизос молемс шабат, эрь ковонь ярмаконь пандомась.
Госсоветть президиумонц заседанияса Мордовиясь азфоль ся региоттнень лувксса, конат сяда эффективнайста работайхть социальнай контрактонь программать коряс, конань эряфс ётафтоманкса нолдаф пцтай миллиард цалковай. Контракттнень 70 процентсна кемокстафт шаба мархта ашу семьятнень мархта, тяконь лувксса – лама иденнетнень. Тяфтама лезкс получась Ичалковскяй районцта Сурайкиттнень семьясновок.
«Меля минь кемокстаме социальнай контракт животноводствать виияфнеманкса, - азондозе республикань Оцюняти Ольга Сурайкина. – Тяни минь улихть оцю сюра жуватаньке, вазняньке, пурхцкяньке. Хозяйстваньконь арьсекшнетяма келептемс».
Лама идень семьяса шабатне рана арсихть лездыкс тядяснонды-аляснонды, и тя кондясни тест сяда товолдонь эряфсост. Ковылкинскяй районцта Мещерякофнень семьяста инь ёмлась, сисем кизоса Ален, кизефтезе Мордовиянь Оцюнять, кодама работа сон может тиендемс кудъёткса.
«Кудса тейне тиевомшка пцтай любой тевсь, тяконь лувксса маштан касфтома семботь, мезе касонды Приволжскяй федеральнай округса – минь семьяньконь оцюволь перец. Кядьса покодемазень мон пяк кельгса, и тоньге кошаряте тянди, сяс мес ков сяда лама работат кядьса, тов сяда вииякшни пря уйсь», - отвечась васенце класса тонафни Аленти Артём Алексеевич.
Лама идень семьятне получасть казнет, тяконь лувксса – Саранск ошень культурнай объекттненди сашендоманкса абонемент.
Тядятне-алятне и шабатне стане жа сашендсть аф шавонь кятть – кеняртьфтсть эсь асушиснон мархта: стихса, вокалса, музыкальнай инструменца налхкомаса.
«Оцю сюкпря тердеманкса, оцю казненкса, кона максф семьяньконди, родителень трудоньконди оцю питнень максоманкса. Мялезе азомс сюкпря Россиянь Президентти Владимир Владимирович Путинонди, кона лезни ванфнемс государствасонк семьянь питнешитнень», - мярьгсь Саранскяень эряйсь Ольга Трубенкова, 10 шабань тядясь.
Мордовия Республикань Оцюнять пресс-службац