«Маластонь пингть эряма вастонь строяманкса кочкавихть вете участкат Саранскяйть юго-восточнай пялькссонза, марстонь площадьсна 125 гектар, учендови, што тяса эвондай 1,5 миллион квадратнай метра эряма васта, - азозе Артём Здунов. – Арьсекшневи нолдамс тевс «Юбилейный» эрямань комплексть котоце микрорайонцонза территориянц. Тячи тейнек эряви сембе ширде ваномс мезе тяса строямс, кулхцондсаськ сембе мяльхнень-арьсематнень тянь коряс и приматама решеният».
Котоце микрорайонть территорияц север ширде ащи «Мордовия Арена» стадионть, южнай ширде – «Мегастрой» гипермаркетть, западнай ширде – Инсарать набережнаенц, восточнай ширде – Кочкуровскяй ульцять и «Тавла» гостинично-жилой комплексть мархта ряцок.
Градостроительнай советть участниконзонды ваномс лихтьфтольхть тя территориять эса строямань архитектурно-планировочнай кафта вариантт Саранскяень кафта застройщикнень эзда. Панжада вайгялень максомать вельде кочкаф концепциясь, конань коряс арьсекшневи строямс 190 тёжянь квадратнай метра эряма васта, 350 вастонди идень сад и 700 вастонди школа. Васенце концепциять эса мяльс сявфт пешеходно-прогулочнай васттне – арьсекшневи пешеходнай бульвархне сотнесазь Инсарать набережнаенц «Юбилейный» эрямань комплексть омбоце микрорайонца уликс бульвархнень мархта.
Стане жа градсоветть заседанияса ванфоль Саранск ошень округть территорияса, тяконь лувксса котоце микрорайонца дорожнай движениять ладяманц коряс кизефкссь.
Мордовия Республикань Оцюнять пресс-службац