Артём Здунов – здравоохранениянь первичнай звенать одкстоптоманц колга: «Президентсь путсь задача: фкявок цалковайсь тяза ту лия целенди!»

Артём Здунов – здравоохранениянь первичнай звенать одкстоптоманц колга: «Президентсь путсь задача: фкявок цалковайсь тяза ту лия целенди!»

6 апрельста Мордовиянь Оцюнять аф лама пингс тевонзон тиендисна Артём Здунов ульсь 3№ поликлиникаса, кона ащи Саранскяйса Российскяй Армиянь проспектса.

Республикань вятись ванозень медучреждениять сембе возможностензон, кона обслуживандай 20 тежянь эряй. Тяса тевс ноляви «ужяльди поликлиникань» принципсь, мзярда марнек логистикась ладяф сянкса, штоба улель пара пациенттненди и сяда эффективнайста работаль персоналсь. Поликлиникать гордостень маряма вастоц – КТ- и МРТ-диагностикань кабинеттнень оборудованиясна. Пандемиять пингста тяса обслуживандафоль 17 тежянь пациент. Од поликлиникась, кона оборудовандаф тяниень пингонь инь од техникаса, тя аф теждя пингть валхтозе вельф оцю сталмоть стационарнай учреждениятнень лангста, мезть мархта лездсь региональнай здравоохраненияти сяськомс ситуациять.

Амбулаторнай онкологическяй лезксонь центрась – од поликлиникать тага фкя эсь лацонь ширец. Тяса тиендевихть сембе процедуратне, конат лезнихть эсь пингстонза мушендомс онкологическяй урматнень. Работай нльне специальнай психологическяй лезксонь кабинет сятненди, кие васедсь тя пелькс диагнозть мархта.

Артём Здунов ванозе работаса телемедицинать. Поликлиникань кардиологсь етафтсь консультация Лямбирскяй районца поселковай ФАП-са работай ялганцты. Телекардиографть вельде теенза удалась ваномс сярядить даннаензон и максомс советт сяда товолдонь пчкафнеманц коряс.

Стане жа региононь вятись корхнесь медицинскяй профилактикань сотрудникнень и пациенттнень мархта – тяса мольфтеви коронавируснай инфекциять каршес вакцинациясь. Сембе процедуратне етафтовихть сембе вешфксненди отвечазь, райононь эряйхнень прививкас серматфтомасна мольфтеви отькорьста. Лятфтасаськ, ня шитнень республикав пачфтьфоль вакцинань 33700 комплект, а сембоц – пцтай 100 тежянь. Эрь шиня прививкат тифнихть пцтай 2 тежятть ломанць, сембоц вакцинать получазь 62 тежяньда лама Мордовиянь эряйсь.

МР-нь здравоохранениянь министрть тевонзон тиендисна Олег Маркин азондсь Артём Здуновонди здравоохранениянь первичнай звенать одкстоптоманц коряс вете кизонь программать Мордовияса эряфс етафтоманц колга, кона сувафтф тевс тя кизоть ушетксста. Лятфтасаськ, «первичкать» одкстоптоманц коряс работась арьсефоль Россиянь Президентть Владимир Путинонь мархта. Мероприятиятне, конат аноклафтольхть Мордовияти, поладозь уликс региональнай проектть и максыхть дополнительнай возможностть здравоохранениянь амбулаторнай звенать виияфнеманкса.

Министрсь азондсь региононь Оцюняти республикаса марнек первичнай звенать инвентаризациянц колга, башка велетнень эса. Результаттне няфтезь – поликлиническяй отделениятнень марнек инфраструктураснон 60 лама процентоц веши капитальнай ремонтонь тиема. 100 лама зданиять нормативнай состоянияс пачфтеманкса эрявксты 10,7 миллиард цалковай. «Модернизация первичного звена здравоохранения» программать эряфс етафтоманц рамкаса республикась получась ни федеральнай центраста 2,8 миллиард цалковай. Васенцесь, мезенди карьхцявихть ня средстватне – Рузаевкаса идень од поликлиникать строямац, кона тячи ащи аварийнай состоянияса. Артём Здуновонь мярьгоманц коряс проектсь сувафтф одкстоптомань программати, аноклави ни ПСД-сь, максф модань участка.

Тяда башка, 5 апрельста сявомок ушетфт строительно-монтажнай работатне Саранскяйса 2№ идень поликлиникаса, проектированиянь стадияса – нинге 5 первичнай подразделениятнень капремонтсна, синь лувкссост – Краснослободскяй, Рузаевскяй и Комсомольскяй районнай больницятне. Кода азозе министрсь, средстватнень 70 лама процентсна модернизациянь сембе бюджетть рамкаса нолдафт капремонтонди, строяманди, а 28 процентсь – оборудованиянь и транспортонь рамаманди. Тядденди платтнень эса – рамамс 238 единица медицинскяй оборудования и 58 легковой машина.

Сембоц 2021 кизоня Мордовиянь здравоохранениянь первичнай звенать тяниень пингонь сембе вешфксненди отвечайкс тиеманкса нолдави 525 миллионда лама цалковай.

Артём Здунов китькстазе: «Сембе средстватне, конат сашендыхть республикав здравоохранениянь первичнай звенать кемокснеманкса, должетт улемс нолдафт тевс кода можна сяда эффективнайста Мордовиянь эряйхнень интересснон мяльса кирдезь. Сяс  региональнай минздравть главнай задачац – кемоста ваномс, штоба фкявок цалковайсь афоль ту лия целенди! Тя Президентть порученияц, вете кизоста тейнек эряви тиемс тя сферать сембе вешфксненди отвечайкс».

А