22 октябрьста Саранскяйса улемстонза Россиянь Правительствать Председателенц полафтыец Дмитрий Чернышенко марса Мордовиянь Оцюнять Артём Здуновонь мархта ульсть Н.П.Огарёвонь лемса Национальнай исследовательскяй Мордовскяй государственнай университетонь биотехнологиянь и биологиянь факультетса.
Вице-премьерти няфтезь университетть виияфнеманкса программать и азозь «Приоритет-2030» стратегическяй академическяй лидерствань Программань гранть базовай пяльксонц эряфс ётафтоманц коряс планть. Дмитрий Чернышенко азозе: грантть вельде университетса эряфс ётафтфт оцю технологиянь производствать тиеманц коряс 4 проектт, мольфтеви эрьгав покодема региононь работань макссихнень мархта марстонь тевонь вятемать коряс.
«Правительствась путни эсь инголенза цель кирнемс од специалисттнень ширеснон, конатненди ули вешфкс сембе мирса, и университетса тиф тонафнемань системась водендаф тя задачать пяшкотькшнеманкса. Ули наукати и предпринимательствати од ломаттнень водендакшнемаснон коряс программа, покоди технологическяй предпринимателень бизнес-клуб, стартапонь фабрика. Университетти удалась пуроптомс кооперациянь система экономикань реальнай секторонь предприятиятнень мархта. Магистратурань и аспирантурань программатнень 30 процентсна ётафневихть эряфс марса партнёрхнень мархта, тонафнихнень 50 процентсна ётнихть стажировка региононь инновационнай предприятиятнень эса», - мярьгсь Дмитрий Чернышенко.
Вице-премьерсь ванозень кой-кона лабораториятнень. Макссь оцю питне научнай разработкатненди. Тяфта, биологическяй араламань лабораторияса получафоль биофунгицид – эффективнай биологическяй средства грибной и бактериальнай урмада касыкснень араламанкса.
Биополимеронь лабораторияса анокласть кормовой белок, конат ащихть орга лаца, синь касфтфт республикань пищевой производствань ляткснень эзда, а стане жа аф кондиционнай сероста.
«Университетсь путни оцю путкс регионть социально-экономическяй виияфнеманцты, фатнемок аф фкя лацонь ширетнень. Тя искусственнай интеллектсь, биокомпозиционнай материалхне, энергообеспечениянь импульснай систематне и фармацевтическяй промышленностсь. Интеллектуальнай собственностень объекттнень 50 процентсна сувафтфт регионть экономикас, 1,7-крда касфтф республикать валовай региональнай продуктанцты вузть путксоц», - поладозе Дмитрий Чернышенко.
Артём Здунов китькстазе: Н.П.Огарёвонь лемса МГУ-сь ащи регионть научнай, образовательнай и просветительскяй деятельностенц центракс.
«Минь арьсеськ, што вузсь заняй пря Мордовияти пяк эрявикс проекттнень мархта: сай пингонь медицинать, фотоникать, функциональнай электроникать, искусственнай интеллектть, од поколениянь материалхнень и энергосбережениять, «ёню» велень хозяйствать», - мярьгсь региононь Оцюнясь. Стане жа сон поладозе, што проектть мяльса кирдезь эряфс ётафтовихть пцтай 90 мероприятия.
Мордовия Республикань Оцюнять пресс-службац