12 январьста культурнай инициативань Президентонь фондть генеральнай директороц Роман Карманов ванозе И.Д.Воронинонь лемса Мордовскяй республиканскяй краеведческяй музейть экспозициянц. Экскурсиять пингста инжити няфтезь культурань сфераса региононь инициативатнень.
Тяфта, корхтамась мольфтевсь «Шумбрат» мокшэрзянь народть общественнай организациянц проектонц колга, конань мяльса кирдезь арьсеф ётафтомс регионъётконь этнокультурнай фестиваль Россиянь ся уженятнень эса, коса эряйхть мокшетне и эрзятне. Фестивальсь водендаф национальнай кяльхнень и культурать ванфтоманкса и содафокс тиендеманкса. Стане жа корхтафоль краеведениянь музейть «Легенды дворянских усадеб» проектонц колга, кона ётафтови эряфс грантонь ярмакнень вельде.
Тяда башка, культурнай инициативань Президентонь фондть генеральнай директороц Роман Карманов ванозе од экспозициять, кона лемтьф Мордовскяй автономиять пуроптомста 92 кизонь топодемати.
«Музейса няфтьф экспозициясь, - тя оцю путкс Мордовия Республикать историянц ванфтоманцты. Музейсь – республикань эряйхненди и инжихненди пуромома васта, тя оцюдонга оцю козяши, кона эряви ужяльдезь ванфнемс и пачфнемс сай поколениятненди», - мярьгсь Роман Карманов.