Марат Хуснуллин: «Россиянь Правительствась кармай кирнемонза Мордовиять ширенц»

Марат Хуснуллин: «Россиянь Правительствась кармай кирнемонза Мордовиять ширенц»

16 июльста Мордовияв рабочай поездка мархта сась Россиянь Правительствать Председателенц заместителец Марат Хуснуллин.

Республикань Кудса етась Марат Хуснуллинонь и Мордовиянь Оцюнять аф лама пингс тевонзон тиендиснон Артём Здуновонь рабочай васедемасна. Ванфоль регионца «Жилье и городская среда» и «Безопасные и качественные автомобильные дороги» национальнай проекттнень пяшкотькшнемасна.

Стане жа Марат Хуснуллинонь председательстванц ала Республикань Кудса етась регионть социально-экономическяй виияфнеманц мархта сотф кизефкснень коряс совещания. Корхтафоль республикаса од инвестиционнай проекттнень эряфс етафтомаснон, бюджетть сбалансированностенц обеспечендаманц, жилищнай и дорожнай строительствать виифнеманц, а стане жа сексень-тялонь пингти анокламать колга.

Вице-премьерсь китькстазе, што федеральнай центрась шарфни мяль регионть виияфнеманцты, сонь финансовай ширенц кемокснеманцты. «Республикать оцю бюджетнай шумоц – тя стака наследия, и прябалась эряви системнайста решандакшнемс. Мордовиянь эряйхненди аш кода муцсемс тя шумоть инкса, регионти эряви касондомс-вииякшнемс, - мярьгсь Марат Хуснуллин. – Мон сань пара куля мархта -  исяк Правительствась нолдась республикати дополнительнай финансовай лезкс – 1,5 миллиард цалковай».

Тяда башка, кафта недяляда тяда инголе регионць получась дополнительнай средстват (500 миллион цалковай) кинь петеманкса – Мордовиянь Оцюнять аф лама пингс тевонзон тиендисна спасибась Россиянь Президентти и Правительствати тянкса. Ярмакне улихть нолдафт муниципалитеттненди, местнай назначениянь кинь строяманкса, нормативнай состоянияс пачфтевихть пцтай 50 вайгяльбень кувалмоса китне.

«Сембоц тядде федеральнай бюджетсь макссь регионти 7 миллиартт цалковаень лувксса лезкс – и тянь лангс минь аф лоткатама, - китькстазе Марат Хуснуллин. – Россиянь Правительствась кармай кирнемонза Мордовиять ширенц, сяс мес минь няйхтяма цебярь, системнай работа социально-экономическяй виифнемать коряс. Республикась аф анци ярмакт, а работай сонць.Стане жа мон кирнеса  Саранск – Рузаевка агломарациять виифнеманц коряс мяльть ширенц».

Мордовиянь Оцюнять аф лама пингс тевонзон тиендисна Артём Здунов азозе: кизоть васенце пялестонза эряма вастонь строямась кассь 104 процентта. «Лувондса, што минь улихть оцюдонга оцю резерваньке работанди: тя уроз иттненди квартиратне, аварийнай эряма вастста етафтомась, - мярьгсь республикать вятиец. Минь кочкаськ ни строямань васттнень. Минь установканьке – кизоньберьфонь касомась должен улемс аф 5 процентта кржа. Тя оцю работа, но сон пяшкодевомшка».

Республикась примай участия тя отраслять стимулированиянц коряс специальнай программаса.

«Стимулсь» - регионца фкя инь вешеви программась, - мярьгсь Марат Хуснуллин. – Механизмась пяк простой: сяда лама ярмак получсихть ся региоттне, коса тевс сувафневи сяда лама квадратнай метра. Мордовиясь отькорьста примси участия тя программаса. Идень саттне, школатне, китне, инженернай коммуникациятне – программать работанц результатонза, минь карматама полаткшнемонза сонь. Региоттненди максовихть инфраструктурнай бюджетнай кредитт, а тя пцтай триллион цалковай 4 кизос. 150 миллиард цалковай региоттненди нолдави ЖКХ-ти. Артём Алексеевич путсь инголен лама кизефкс Мордовияса ташта инженернай сетьтнень колга. Надияфнян, што минь мутама возможность лездомс тяса регионти».

Стане жа совещанияса корхтафоль республикаса аф шумордаф строительствать колга. Васендакиге корхтафоль Тысячелетиянь площадьса универсальнай залть колга.

«Объектсь эряви строямс – тяни поздна ни корхнемс, правильнаель тя решениясь или аф – строямс сонь, - китькстазе вице-премьерсь. – Кда ни кярьмотьф, карьхцяфт ярмакт, сон эряви сувафтомс тевс. Мон, кода профессиональнай строитель, лувондса, што любой объектсь должен строявомс аф колма кизода ламос. И аш кода ушеткшнемс строяма, кда аш финансовай обеспечения».

Совещанияса корхтафоль тя объектса строительнай работань планть-графикть колга. Лятфтасаськ, Россиянь Правительствась примась решения нолдамс универсальнай залть строяманц шумордаманкса 851,8 миллион цалковай.


Мордовия Республикань Оцюнять пресс-службац