28 декабрьста Мордовиянь Оцюнясь Артём Здунов васетькшнесь Республикань Кудса Атяшевскяй районцта Молчанофнень семьяснон мархта. Лятфтасаськ, синь содафтсть ковда тяда инголе, мзярда республикань Оцюнясь ульсь районца рабочай поездка мархта.
Отец Дмитрий служай настоятелькс Сабанчеева велеса Святотроицкяй церькавса. Власттнень ширень кирдемаснон и атяшевскяй предпринимательхнень лезксснон вельде Молчанофнень эвондась кафта этажса кудсна. Семьяса сисем итть, кафттне тонафнихть Саранскяйса. Эсь автомобильсна Молчанофнень синневсь и аф петеви. Сашендовсь нолямс тевс такситнень, а тя аф кржа ярмак.
Ноябрьста Артём Здунов надияфтсь лездомс семьяти. Ярмакне автомобилень рамаманкса нолдафтольхть МР-нь Оцюнять резервнай фондстонза.
Республикань вятись примазень инжихнень рабочай кабинетсонза, коса тядятне-алятне чайда симомста азондсть идьснон сатфксснон колга. Оцю цёрась Иван — Н.П.Огарёвонь лемса МГУ-нь студент, лац макссыне экзаметтнень — сась васедемас эстокиге зачётта меле. Стирьсна Елизовета тонафни Пензань художественнай училищаса. Сембода ёмла стирняснонды Марияти — пяле мархта киза.
Отец Дмитрий спасибась Артём Здуновонди эрявикс казненкса. «Тяни минь карматама сяда сидеста няендема шабаньконь мархта и пуромкшнема семьянек од кудсонк», - мярьгсь сон.
Мордовиянь Оцюнясь тяшкстазе: региононь Правительстваса аноклавихть дополнительнай мерат лама идень семьятнень ширеснон кирдеманкса. «Минь регионцонк, павазонди, тяфтама семьяда аф кржа, лезкс эряви ламотненди. Государственнай Собранияти Посланиять эса азфоль, што минь карматама примама закон лама идень семьятненди транспортонь налогть лоткафтоманкса», - китькстазе республикань вятись.
Ульцяса Молчанофнень учендозе сисем вастонь од «Ларгуссь». Артём Здунов максозень ключнень семьянь азорти, и шабатне ушедсть занцемост эсь вастснон. Багажниксь цють пякставсь од кизонь ламбама казнетнень инкса. Отец Дмитрий надияфтсь арфтомс семьянц ошень ульцятнень эзга, ётафтомс экскурсия.
Мордовия Республикань Оцюнять пресс-службац