7 августста Мордовиянь Оцюнясь Артём Здунов поздравляндазень профессиональнай иласнон мархта спортонь и физическяй культурань тевса сембе покодихнень. Физкультурниконь шись - тя спортсметтнень, тренерхнень и наставникнень иласна, сембонь сятнень, кит тиендихть пропаганда эряфонь шумбра койхненди.
Шумбракстомок церемониянь участникнень мархта, Артём Здунов китькстазе, што российскяй спортть эрь сяськомац–тя гордость странань сембе эряйхненди.
«Ётай кизось республикань спортсметтненди ульсь козя и сатфксу–медалень марстонь багажсь арась 1253 эрь кодама достоинствань казне. Республикань спортсметтне эрязста няфнесазь эсь пряснон международнай аренаса», - мярьгсь Мордовиянь Оцюнясь.
Китькстафоль, што васенце задачась–обеспечендамс спортивнай резервань апак лотксек и цебярьста анокламать. Тячи республикань спортивнай анокламань системаса заняф 12 тёжяньда лама ломань, конатнень эзда нилецекс пялькссь сувси Мордовиянь эрь кодама дисциплинань коряс сборнайхненди, а 163 спортсменць–Россиянь сборнай командатненди. 17 тёжяньда лама шабась водендафт физкультурно-спортивнай ширень образовательнай программатненди.
Мордовиянь Оцюнясь китькстазе, што оцю сяськоматненди васенце юрсь–массовай спортсь. Тяни республикань эряйхнень лувкссна, конат фалу заняфт физкультураса, арась 60% лама, а целевой ориентирсь, конань путозе странань Президентсь,–70% 2030 кизоти.
«Целеньке - спортса массовай занятиятне. Аф стак лемдеськ тя кизоть республикаса Шумбрашинь кизокс. Спортти эряви арамс культурань пяльксокс, теенза мялень шарфнемась улеза серьёзнай. Республикаса панчсевихть од объектт, тяконь лувксса, эсь лацонь фиджитал-центра и Шра лангонь теннисонь центра, кона одкстоптф Федерациять лезксонц вельде. Башка мяль шарфневи идень площадкатнень оснащенияснонды и тренировочнай процессти цифровой технологиятнень сувафтомаснонды»,–китькстазе МР-нь Оцюнясь Артём Здунов.
Спасибамань башка валхт азфтольхть отраслянь тренерхнень и ветераттнень лемс.
Казьфнень ёткса тя шиня ‑ физическяй культурань ветератт, опытнай тренерхт-педагокт, перспективнай од специалистт, а стане жа спортсметт, конат сатсть сяськомат тя или тона серень оцю пялькстоматнень эса. РФ‑нь Президентть указонц коряс «РФ‑нь физическяй культурань Заслуженнай работник» почётнай лемсь максф «Спортивная школа олимпийского резерва по шорт-треку» башка подразделениянь старшай тренерти-преподавательти Иван Супонинонди. Иван Супонинонь спортивнай тевса покодемань марстонь стажец 50 кизода лама.
«Васенце вастти фалу путнема ломанькс улемась, порядочностсь и содамошинь максомась, конат лездыхть спортсметтненди примсемс виде решеният и спортса, и эряфса»,–кемай Иван Супонин.
Лямбе валхт спортивнай сообществать лемс кайгсть и МР-нь Правительствать Председателенц васенце заместителенц Галина Лотвановать эзда. Спортонь и физическяй культурань тевса покодихненди казнет тяфта жа макссь Мордовия Республикань спортонь министрсь Никита Ларьков.
Мордовия Республикань Оцюнять Пресс-службац