11 декабрьста РДК-са етась «Шумбрат, Мордовия!» народнай творчествань 20-це республиканскяй фестивальть Гала-концертоц. Мордовиянь Оцюнясь Владимир Волков поздравляндазень фестивалень участникнень и казезень казнетнень.
Кода отмечазе Мордовиянь Оцюнясь, пара койс коре, Гала-концертть мархта тиендевихть итокт республикать культурнай эряфсонза оцю и пяк эрявикс событияти – «Шумбрат, Мордовия!» народнай творчествань 20-це республиканскяй фестивальти.
«Тя фестивальсь республикаса кельгови пяк ламотненди, - мярьгсь Владимир Волков. – Теенза аноклайхть нльне инь емла велень поселениятне, етафнихть репетицият кизоньберьф. Юбилейнай фестивальсь лемтьфоль Кинонь кизоти, и кода фалу етась цебярьста. «Шумбрат, Мордовия!» фестивальсь фкя инь лама ломанень пуропнись странаса – велень, райононь, ошень и республиканскяй этапнень эса участия примась 100 тежяньда лама ломань. Тя Мордовиянь пцтай эрь кафксоце эряйсь! Кафта ковда ламос республикань райоттнень отчетнай концертснон пингста тя залса ульсь афкуксонь аншлаг. Тя пингста РДК-ть сценанц лангса выступандась 6,5 тежянь ломань, 40 процентсна – шабат. Минь улихть коллективоньке, конат фестивалень сценать лангсот сембе 20 кизоть, примсесть участия марнек заключительнай концерттнень эса. Мялезе отмечамс кой-конатнень еткстост. Тя Сире Теризморгань народнай хорсь, «Поляне» ансамбльсь, Кочетовскяй и Кадошкинскяй народнай хорхне, «Умырзая» моронь и кштимань народнай ансамбльсь, «Конак» семейнай ансамбльсь, Чамзинскяй райононь «Дигаля» ансамбльсь и лиятне».
Бабаснон и атяснон, тядяснон и аляснон вастс сашенды од поколениясь. Эрь кизоня республиканскяй сценать лангса «крьвясневихть» од тяштенят. Тяфта ульсь юбилейнай фестивальть пингстовок. Ваныхненди мяляфтовсть Оцю Игнатоваста вокалисткать Ульяна Куликовать выступленияц, Ковылкинаста Кристина Ушаковать саксофонца морамац, «Пайгонят» вокальнай ансамбльть и Ромодановаста «Аленушка» идень садонь воспитанникнень номерсна.
«Тячиень заключительнай концертти билеттне рамафтольхть инголенди и пяк курокста. Спасиба, што хоть тейне кадоде фкя билеткя. Содаса, што аф теждяль билеттнень сатомасна и райоттнень отчетнай концертозост. Лувондса, што тя ламода кемокснесы фестивальти ломаттнень кельгомаснон. Эстрадань кой-кона «тяшттненди» пример сявомаль эздонт, кода саламс ваныть мяленц. Исполнительскяй мастерствать коряс фестивалень ламоц участникне мезьсовок аф кальдяфт профессионалхнень коряс. Тяка пингть сценать лангса выступандакшнихть простой труженикне: дояркатне, жуватань кирдихне, строительхне, педагокне, медработникне и лиятне. Сяс минь видеста азсаськ, што именна тинь – афкуксонь народнай артисттне!», - китькстазе Владимир Волков.
Республикань эрь районть, эрь велеть эсь лацоннет культурнай коенза-обуцянза. «Шумбрат, Мордовия!» фестивальсь тага весть тянь кемокстазе. Народнай творчествать эсь лацонь ширенза – тя Мордовиять аф аньцек оцю козяшиц, но и маласькофни виец, кона лезни ломаттненди пуромомс марс, сяда лац шарьхкодемс фкя-фкянь. Россиянь Президентсь В.В.Путин эсь Посланиясонза китькстазе, што сембе минь – Россиянь граждаттама – фкя народ, лама национальностень фкя семья.
«Тячи тя залса минь приметнесаськ аф фкя лацонь тюснень, народнай асушинь козяшить, - мярьгсь Мордовиянь Оцюнясь. – Кажнайсь тя ломаттнень эзда – эсь народонц национальнай культуранц ванфтыец. Эрьда сяда товга марса карматама виияфнемонза народнай творчествать, кородозь ванфнесаськ народнай койхнень-обуцятнень. Эрьда марса кайгиста мярьктам «Шумбрат, Мордовия!» Шумбрат, сяда товолдень 21-це фестивальсь!».
Российскяй Федерациянь Президентть Указонц мархта отечественнай культурать и искусствать виияфнемаснонды оцю путксонкса и лама кизонь цебярь работанкса «Заслуженный работник культуры Российской Федерации» почетнай званиясь максфоль Старошайговскяй муниципальнай райононь национальнай культурань Центрать директоронцты Нина Кадеровати.
Мордовия Республикань Оцюнять Указонц мархта фестивалень несколька участниксь культурать ванфтомаса оцю путксонкса и «Шумбрат, Мордовия!» народнай творчествань республиканскяй фестивальса активнай участиянь примсеманкса получазь «Заслуженный работник культуры Республики Мордовия» почетнай званиять. Тяда башка, казьфтольхть Мордовия Республикань Почетнай грамотат и максфтольхть «Лауреат премии Главы Республики Мордовия» званият. Ламоц творческяй коллектифне получасть казнет.