Судейскяй органонь этай кизонь покодемань итокнень и сай пингть лангс задачатнень колга пачфтсь Мордовия Республикань Верховнай Судть Председателец Валерий Кияйкин. Сон китькстазе: 2024 кизоня ульсь ванф 200 тежяньда лама судебнай тев. Тя 10 % сяда кржа, чем ётай кизоть. Тяка пингть, ульсь китькстаф, што судьятнень лангс нагрузкась эрь кизоня касонды тефнень стакашиснон инкса. 140 тежяньда лама ванф тев –тя гражданскяй тефт, 30 тежянтть малава – административнай правонарушениятнень коряс тев, 18 тежяньда ламось – административнай судопроизводства. Мекольце тевонь категориять коряс сявф 400 млн цалковайда лама.
Судебнай решениянь стабильностсь республикаса лядонды оцю уровеньца. Ульсь китькстаф, што ётай кизонь показательхнень коряс судебнай актонь ётафтомань качествать коряс Мордовиясь сувси колма инголи моли странань субъекттнень ёткс, а гражданскяй тефнень коряс судебнай коллегиять покодемань результатонзонды максф инь оцю питне васенце кассационнай округса.
Валерий Кияйкин сюконясь республикань руководствати ванфонкса и региононь судьятнень покодемань условияснон цебярьгофтомаснон инкса.
«Минь Президентоньке аф весть китькснезе стратегическяй задачакс ломаттнень лемс правосудиять сатовишинц эрявиксшинц, судтнень панжада тевонь вятемаснон и фкя лаца судебнай практикань тиемать. Минь тянди шашнетяма системна. Мялезе сюконямс эрьти эздонтт, што странати стака пингста, конац сотф специальнай задачатнень пяшкодемаснон иархта, минь судебнай системаньке покоди апак лотксек и виень апак ужяльдть», - пшкядсь регионтть судейскяй корпузонцты Артём Здунов.
Взаимодействиянь ключевой тематнень эзда фкясь – мировой судьятнень тевснон вятемасна. Мекольце колма кизотнень цебярьготьфт судьятнень покодемань условиясна – сисем районцта 14 судебнай участка ётафтф лия вастс, ётай кизонь декабрьста петемада меле ётафтф Саранскяень Октябрьскяй райононь нинге кота мировой судьянь судебнай участкат. Тячиень шити таколфтыкс лядонды ситуациясь Рузаевскяй и Зубово-Полянскяй райоттнень судебнай участкань зданияснон мархта. Рузаевкаса ладяй помещениясь уже кочкаф.
Башка ванф ульсь максф «Организация делопроизводства мирового судьи». информационнай автоматизированнай системать нинге сяда цебярьгофтоманцты. 2024 кизоня ушедсь сонь модернизацияц, тя кизоть лангс путф планц нинге фкя этапоц.
Тяфта жа региональнай власттнень и судейскяй корпусть инголе ащи мзярошка задача – тя идтненди-сиротатненди эряма вастонь максомась, аф аралаф населениянь категоритненди, лама идь мархта семьятненди, СВО-нь участникненди лезкссь.
Мордовиянь Оцюнясь сюконясь судейскяй оргаттненди бизнесть сетьме покодеманцты условиянь тиемать инкса. Президентсь путозе Мордовиять инвестиционнай климатть виензаманц, бизнесонь субъекттнень лувксснон касомаснон коряс вете региоттнень-лидерхнень ёткс.
«Сюконян сембонди ётай кизоня марс покодеманкса и арьсян сяда товолдонь сатфкс», - мярьгсь Артём Здунов.
Совещаниянь участникнень тяфта жа шумбракстозень Мордовиянь Госсобраниянь Председательсь Владимир Чибиркин. «Эрь ванф тевонттень мельге ащихть республикань ломанень и организациянь судьбат. Исполнительнай, законодательнай и судебнай власттнень марспокодемасна лезни ванфтомс регионца стабильность», - китькстазе сон.
Марстонь юрисдикциянь судтнень и правовой тевонь пяшкодемань организациятнень покодемань итокснон колга доклад мархта корхтась МР-са Судебнай департаментонь Управлениянь начальниксь Харис Якуббаев.
Мероприятиять пингста ульсть максф государственнай наградатне и азфт судебнай системать тевонь вятеманц колга инь цебярь информационнай сопровождениять лангс пялькстомань итокне.
Мордовия Республикань Оцюнять пресс-службац