«Мон лувондса тя илать Россияса сембода народнайкс. Сюконян карксэземга советскяй милиционерхненди, конат геройкс тюрсть Великай Отечественнай войнань фронттнень эса, службань ветераттненди. Сембонди, кие эрь кодама пингста тюрсь пси точкатнень эса и кие тяни аралакшнесы странать марстоньшинц и суверенитетонц специальнай военнай операциять пингста. Минь фалу карматама мяляфтомост правопорядкань солдаттнень, конат эсь эряфснон мархта няфтсть отвагань, мужествань и честень пример. Сятнень, кие шавовсь, педа-пес пяшкодемок Родинать инголе долгснон. Синь сембе пингс кармайхть мархтонк фкя стройса», - мярьгсь Мордовиянь Оцюнясь, азомок минута кашт аф молезь ащема геройхнень колга лятфтаманкса.
Артём Здунов китькстазе, што Мордовиянь МВД-са пуроптф профессиональнай коллектив. Главнай цельсь тяни – кемокстамс ломаттнень ширде довериять и марса решандакшнемс задачатнень, конатнень путозень Россиянь Президентсь. Сон надияфтсь, што республикань руководствась кармай сембоса лезнема министерствати.
Региононь Оцюнясь азозе, што тяда инголе ульсь ся васттнень эса, коса республикань мобилизованнай эряйхне ётнихть боевой слаживания, спасибась сембонди, кие кирнесы боецоньконь ширеснон. «Башка мяль тяниень пингть шарфтома ся цёратненди-стирьхненди, кинь алясна туфт СВО-нь зонав, уроз шабатненди. Синь внимательнайста ваныхть сянь мельге, кода малаткшнетяма сянди, мезе тиендеви перьфпяле, мезе тиенттяма, минь морально-психологическяй состоянияньконди. Синь – минь сай пингоньке!» - мярьгсь Артём Здунов.
Регионца тядде ётафтфоль 4 тёжяньда лама массовай мероприятия. Сембе синь ётафтовсть оцю уровеньца. Тя корхтай цебярь профилактическяй работать колга. Тя результаттнень эшксса ащи правоохранительнай блоконь работникнень оцю профессионализмасна. 2023 кизоня регионца стане жа ётафтови аф кржа оцю мероприятия.
Азфоль, што марстонь вийса важна персемс кить организованнай преступность вихонзаманцты, аралакшнемс од ломаттнень экстремизмань пропагандать и наркотическяй веществатнень тевс нолямаснонды водендамать эзда.
«Эвондасть задачат, конат ашельхть 20 кизода тяда инголе – тя информационнай безопасностень кизефксне. Регистрировандаф преступлениятнень пцтай колмоцекс пялькссна – тя правонарушениятне, конатнень тиемстост тевс нолявихть электроннай технологиятне, синь канневихть вельф стакатненди. Минь водендаме сатомшка ресурс, тиеме мониторингонь специализированнай центра. Тиемс порядка тя сфераса ули кода аньцек марстонь вийса. Лездыкс тя тевса теенть араст тренерхне, преподавательхне, школатнень эса завучне», - пшкядсь пуромфненди Мордовиянь Оцюнясь.
Ламоц задачатне, конат путфтольхть кизоть ушетксста, пяшкотьфт. Синь сотфт государственнай казнать пяшкотькшнеманц, имуществать мрдафнеманц, кона канневи народти, но ворьфтьфоль преступнай схематнень тевс нолдазь. Тяка пингть Артём Здунов азозень ширетнень, конатнень коряс нинге сави работамс: тейнек эряви мрдафтомс государственнай казнати аф законц коре лихтьф сембе финанснень и актифнень, пяшкодемс ответственнай бизнесть карьхцензон.
«Тяфтама задача путф инголен Российскяй Федерациянь Президентть мархта: тя ярмакне должетт служамс ломаттненди, нолявомс инфраструктурать виияфнеманкса и семьятнень, боецнень, конат тячи аралакшнесазь странаньконь, ширеснон кирдеманкса», - азозе региононь Оцюнясь.
Благодарностень валхт Артём Здунов азсь региональнай МВД-нь од министрти Юрий Поляковонди оперативнай обстановкать лангс башка мялень шарфнеманкса, ветеранскяй составти, сотрудникнень, конат шавовсть служебнай долгснон пяшкодемста, семьяснонды.
Республикань Оцюнясь спасибась внутренняй тевонь органонь сембе сотрудникненди профессиональнай службанкса, арьсесь мир и благополучия: «Аш сяда достойнай служба погонца ломаттнень службаснон коряс, кит ванфнесазь российскяй народть интересонзон. Ванфтость прянтень, мала ломанентень, сай пингонь поколениять!» - мярьгсь сон.
Торжественнай церемониять пингста максфтольхть оцю казнет инь цебярь сотрудникненди. Несколька полицейскяйсь получасть сертификатт эрямань условияснон цебярьгофнеманкса. Синь ётксост Терёшкиттнень семьясна – миртть-рьвят кафцьке служайхть правоохранительнай органонь подразделениятнень эса.
Ярмаконь премияса отмечафтольхть МВД-нь сотрудниконь несколька следственно-оперативнай группась. Фкясь эздост орадсь мошенническяй тевонь 85 эпизод, конатнень тиезень фкя ломанць 5,5 миллион цалковай марстонь лувксс. МВД-нь Ардатовскяй отделонь сотрудникне орадозь преступлениять, конань тиезе тядясь, кона ёрдазе тялонда ульцяв эсь шабанц. МР-ть эзга МВД-нь Следственнай управлениянь группась перязе кить ломаттненди, конат заняфтольхть эсь собственностезост недвижимостень и модань участкань аф законц коре оформляндамаса. Материальнай карьхцсь тя тевть эзда арась 8 миллионда лама цалковай. Сембе средстватне мрдафтфт.
«Формаса эрь гражданинць няфни эсь мархтонза закон и спроведливость. Сатомс довериять ули кода аньцек тевти ответственностень марязь малаткшнемать вельде, ломаттнень прябаласнонды шарьхкодезь малаткшнезь», - китькстазе внутренняй тевонь министрсь Юрий Поляков.
Ведомствань руководительсь китькстазе, што примсеви мератне тядде макссть ванфтомс оперативнай ситуациять мяльге контрольть, а кой-кона позициятнень коряс цебярьгофнемс сонь. Сяда кржа арась регионца салсемада, разюойда. Муф пцтай 200 подозреваемай и муворгофневи ломань, куляфтома 237 юмаф. Бюджетти мрдафтф 580 миллионда лама цалковай оратф преступлениятнень коряс.
Меколи Юрий Поляков азсь благодарностень валхт региононь руководствати оцю государственнай задачатнень пяшкотькшнемаснонды ответственностень марязь малаткшнеманкса. Сон поздравляндазень коллеганзон, спасибамок теест мужестванкса, а синь семьяснон – ширень кирдеманкса. Внутренняй тевонь министрсь макссь полицейскяйхненди ведомственнай казнет.
Мордовия Республикань Оцюнять пресс-службац