Шуваланяста, 20 январьста, «Саранск-Арена» универсальнай залсь примазень эсь ледовай аренасонза васенце оцю пялькстоматнень.
«Сюкпря Россиянь Президентти Владимир Владимирович Путинонди сянкса, мес кирдезе ширеньконь тя оцю проектть эряфс ётафтомаса! - мярьгсь республикань вятись. - Сянкса, мес нолдафт дополнительнай ярмакт тя долгостройть шумордаманкса. Строямась мольфтевсь 10 кизода ламос. Тейнек верондасть, и минь пяшкодеськ надияфтьфть — сувафтомс тевс объектть декабрь ковть аделавомс, и вов январьста тяса, кода и арьсекшневь, ётафтови юниорхнень ёткса фигурнайста курькснемать коряс Россиянь первенствась. Кеман, сяда тов кармай нинге лама оцю мероприятия, конатнень примасыне од аренась».
Мордовия Республикать эзда Российскяй Федерациянь сенаторсь, международнай тефнень коряс Федерациянь Советонь Комитетть председателенц васенце полафтыец Сергей Кисляк стане жа поздравляндазень пуромфнень спортонь илать мархта. «Тячиень пялькстоматне панчсесазь тя мазы залть историяса васенце лопанять. Сяда тов Саранскяйсь арай оцю спортонь афкуксонь столицакс!» - мярьгсь сон.
Артём Здунов азозе, што пялькстоматнень панжемаса примай участия Индия Республикаса РФ-нь Чрезвычайнай и Полномочнай посолсь Денис Алипов: «Тя аф стак, вдь од ледовай аренась — международнай уровенень площадка».
Индияса фигурнайста курькснемась аньцек ушеткшни виияфневома, аф ваномок тянь лангс, странаса 2003 кизоста сявомок ётафневи национальнай чемпионат, а кафта кизода тяда инголе Индияста фигуристтне ульсть васенцекс международнай Гран-принь юниорскяй сериять фкя этапсонза. Сяс Мордовиянь Оцюнясь мярьгсь, што республикась анок максомс эсь маштомошинзон и материально-техническяй базанц омба масторонь спортсметтнень анокламанкса, тяконь лувксса индийскяйхнень, а стане жа международнай спортивнай пялькстомань ётафтоманкса.
«Мон васенцеда Саранскяйсан, сельме каян сянди, кодама оцю мяль тяса шарфневи спортонь тя видти — стройсевихть од стадиотт, ледовай аренат, тиендеви сембось од сяськоматнень сатоманкса!» - мярьгсь Денис Алипов.
Конька лангса фигурнайста курькснемань Федерациять генеральнай директороц Александр Коган сюконясь Мордовиянь Оцюняти: «Сюкпря кеме валцень инкса, кона пяшкотьф — минь тячи ащетяма тя мазыдонга мазы Ледовай дворецса! Сюкпря Саранскяень эряйхненди, конат сашендыхть пялькстомас!»
Азфоль, што пялькстоматнень результатснон коряс пуроптови Россиянь сборнайсь, кона няфтьсы странаньконь юниорхнень ёткса миронь чемпионатса Болгариянь София ошса.
20 январьста сявомок пялькстоматнень виде трансляцияснон няфтьсы Васенце каналсь.
Мордовия Республикань Оцюнять пресс-службац