Педагогическяй конференциять работанц ушедомда инголе региононь руководительсь ванозе интерактивнай проектнай выставкать, конань аноклазь республикань школьникне. Тяса няфтьфтольхть «Бинисепт» антисептическяй препаратть и комплекснай фунгициднай препараттнень анокламаснон коряс проекттне, а стане жа республикань населённай пункттнень эзда фкяса «Тиринь Ёнкс» этнопарконь и «Бинилект» батоническяй садонь тиемать коряс проекттне. Мордовиянь Оцюнясь шарфтсь мяль 7№ саранскяй лицеень и Берсеневскяй школань ученикнень мархта «Фиграном» шра лангонь налхкомать лангс, кона максси шабатненди ётнемс тонафнема экономикань сфераса.
Пленарнай заседаниянь участникненди видеообращения мархта пшкядсь РФ-нь просвещениянь министрсь Сергей Кравцов. Сон лятфтазе, што Россиясь должен сувамс образованиять качестванц коряс миронь кемонь инь цебярь странатнень лувксс.
«Эряви поладомс образованиять качестванц цебярьгофнеманц, тиемс семботь, штоба шабатненди афкукс улель интересна тонафнемс школаса. Башка васта тяса занци учительсь. 2023 кизоня, кона странань Президентть мархта азф Педагогонь и наставниконь кизокс, карматама педагогическяй профессиять престиженц касфнеманц коряс», - китькстазе Сергей Кравцов.
Отмечафоль, што оцю работа мольфтеви тонафнемань од вастонь тиендемать, педагокнень трудснон инкса пандомань системать, физкультуранди и спортонди тонафнемань учреждениятнень эса инфраструктурать цебярьгофнемаснон коряс. 1 сентябрьста сявомок Россиянь школатнень эса эряфс ётафтф тонафнемань единай программа, государствань оцюнять инициативанц коряс тиф шабань и од ломанень движения.
«Сембось тя должен воспитандамс ломанть, кона анок участвондамс Родинанц судьбаса, школаса должен путневомс юр кеме гражданскяй позициянди, - отмечазе РФ-нь просвещениянь министрсь.
«Именна образованиясь и питнишитне, конат воспитандакшневихть шабать эса, тиендьсамазь минь единайкс, марса кирди народкс, пуропнесазь и кемокснесазь странаньконь. Россиянь Президентсь Владимир Владимирович Путин российскяй образованияти базовай принципокс азозе справедливостть. Тя корхтай сянь колга, што эрь шабати, аф ащемок эряма вастонц и семьять козяшинц эзда, должен улемс доступнай качественнай образованиясь», - мярьгсь Артём Здунов.
Мордовиянь Оцюнясь отмечазе, што достойнай образованиясь ушеткшневи тяниень пингонь инфраструктурать эзда. «Образование» нацпроектть и лия федеральнай программатнень вельде аньцек тядде Мордовиянь тонафнемань учреждениятнень материально-техническяй базаснон кемокснеманкса нолдаф 1,2 миллиард цалковай.
2022 кизоня панжеви идень сад Саранскяйса Кировонь ульцяса, сай кизоня – шумордави Тавлинскяй набережнайть аймакса школать и саранскяй коррекционнай школать строямасна. 2023-2024 кизотнень арьсеф строямс нинге колма школат – Ромодановскяй райононь Белозерье велеса од корпусть и Саранскяйса кафта школатнень. Школатнень капитальнайста петемань федеральнай программать коряс тядде петьф 12 здания, 2023 кизоня капремонт ётафтови 19 школаса. Мордовиянь Оцюнясь стане жа отмечазе, што башка мяль эряви шарфтомс школьнай пси ярхцамбяльти.
«Лувондса, што эряви полафтомс шабатнень мархта работати малаткшнемать. Эряви азонкшнемс од ломаттненди духовнай мирть колга – духовность виияфнемаса Россиять вастонц, историческяй питнишитнень квалма. Содамошит макссема республикаса минь машттама, тиендьсаськ тянь кемоста. Воспитательнай ширесь должен кемоста сувамс тонафнемань планти», - китькстазе Артём Здунов.
Мордовиянь Оцюнясь азондсь всероссийскяй и международнай олимпиадатнень эса республикань школьникнень сатфксснон колга – асу шабанди лицеень 6 воспитанникне арасть сяськикс, сатомок 9 медальхть – тя Максим Пермяков, ВладимирМихайленко, Илья Беспятый, Максим Раменский, Егор Потапов и Ярослав Шастин.
Азфоль, што 15 сентябрьста сявомок 12 ноябрти молемс Мордовияса ётафтови»Гордость моей Родины» Мордовиянь студенттнень и школьникнень исследовательскяй работаснон конкурссна, кона лемтьф польскяй интервенттнень эзда Москуть волясь нолдамста 410 кизонь топодемати. Мордовиянь Оцюнясь кошардсь водендамс эзонза кода можна сяда лама школьник и студент.
Тядде тонафнемань тевса ули аф кржа одняда. Школатнень эса эрь недяляня кармай кепсевома государственнай флагсь и морави Россиянь гимнась, 5 сентябрьста сявомок ушедови «Разговоры о важном» класснай часттнень ётафнемасна. Тяда башка, тонафнемань учреждениятнень эса ушедыхть работама воспитаниять коряс советникт.
Духовнай воспитаниять важнайшинц ширенц кирдезе и Саранскяй и Мордовскяй митрополитсь Зиновий: «Мезсь кошардсы учительсь шабать седиенц – стамокс сон и кармай».
Единай образовательнай пространствать тевс сувафтоманц колга эсь докладсонза азондсь Мордовиянь образованиянь министрсь Елена Солдатова. Сон корхтась государственнай образовательнай стандартть одкстоптоманц, олимпиаднай движениять виияфнеманц колга. Тяда башка, корхтафоль кадровай обеспечениять колга.
Саранскяень 39№ школань директорсь Сергей Терешкин азондсь «Школа Минпросвещения России» проектть эряфс ётафтоманц колга. «Земский учитель» программать эряфс ётафтоманц коряс наработкатнень квалма пачфтсь Чамзинскяй райононь оцюнять заместителец Татьяна Михеева.
Педагогическяй конференциянь участникнень инголе корхтась М.Е.Евсевьевонь лемса МГПУ-нь ректорсь Марина Антонова и Н.П.Огарёвонь лемса МГУ-нь ректорсь Дмитрий Глушко, Мордовиянь Промышленниконь и предпринимателень союзть председателец Виктор Бирюков.
Мордовиянь школьникне няфтезь Артём Здуновонди «Имя героя – школе» Мордовиянь картать, конань эса няфтьфт республикань 125 школась, конатненди ули кода каннемс геройхнень лемснон – народнай учительхнень, спасательхнень, военнай действиянь участникнень. МГУ-нь ректорсь Дмитрий Глушко надияфтсь, што вузсь сявсыне эсь лангозонза тя важнай проектть ширенц кирдеманц.
Форумть пингста стане жа максфтольхть государственнай казнет. Россиянь Президентть Указонц мархта «За наставничество» отличиянь знакса казьф Саранскяй политехническяй техникумонь производственнай тонафнемань мастерсь Ольга Федякова, «За личный вклад в развитие Республики Мордовия» Мордовия Республикань Оцюнять Почётнай знакса казьф Асу шабанди республиканскяй лицеень директорсь Евгений Вдовин.
Мордовия Республикань Оцюнять пресс-службац