24 мартста И.М.Яушевонь лемса музыкальнай театраса етась торжественнай пуромкс, кона лемтьфоль Культурань работниконь шити. Залу пуромкшнесть республиканскяй музеень и библиотекань, театрань и концертнай организациянь сотрудникне, велень клубонь и культурань кудонь специалисттне. Творческяй профессиянь представительхнень профессиональнай праздникснон мархта поздравляндазень Мордовия Республикань Оцюнясь В.Д.Волков.
Китькстамок культурань работникнень тевснон обществать духовнай ширде вииякшнеманцты оцю путксонц, Владимир Дмитриевич азозе, што республикань руководствась сяда товга кармай макссема теест сембе ширдень лезкс.
Кода отмечазе республикань Оцюнясь, Мордовиясь тячи правас коре сувафневи Россиянь культурнай центратнень лувксс. А сяс лотксемс сатфть лангс аш кода. Республикаса коль стройсевихть культурань од объектт, тиендеви реконструкция уликсненди. Меля Ардатоваса строяфоль Культурнай касомань-вииякшнемань центрась, панжезень кенкшензон Краснослободскяй райононь Куликова велень Культурань кудсь. Саранскяень эряйхненди оцю казнекс арась республиканьконь столицаса Жерар Депардьень Культурнай центранц панжемац. Тяда башка, меля эсь зданиянц получазе «Умарина» моронь и кштимань государственнай ансамбльсь.
Тяддень февральста оцю реконструкцияда меле кенкшензон панжезень Русскяй драматическяй театрась. Аф кунара од сценать лангса ульсь «Ревизор» спектакльть премьерац. В.Д.Волков азозе, што республикань правительствась сяда товга кармай лезнема театральнай искусствать виияфнемаса. «Минь примаме решения тяддень кизоть эзда сявомок макссемс 5 миллиотт цалковаень лувксса специальнай грантт тетратнень творческяй проектснон ширеснон кирнеманкса од постановкань путнеманкса и гастролень пуропнеманкса.
Оцю событиякс тядде арай Саранскяйса Музейно-архивнай комплексть панжемац. Тяда башка, тядде арьсекшневи шумордамс Кочкуровань Культурань кудть строяманц и Рузаевкаса Ухтомскяень клубонц реконструкциянц. Стане жа тиеви ремонт ламоц районнай и велень культурань куттненди, искусствань идень школатненди.
—Тя и ламоц лия объекттнень строямаснон и тиемаснон-петемаснон колга корхтафоль выборда инголе республикань эряйхнень наказснон эса,—азозе В.Д.Волков.—Минь тисаськ семботь, штоба пяшкодемс сянь, мезе надияфнеме ломаттненди.
Эсь выступлениясонза Мордовиянь Оцюнясь лоткась республикаса пуропневи межданароднай культурнай мероприятиятнень лангс, конат фалу етафневихть профессиональнай оцю уровеньца. Башка васта етксост занцихть «Соотечественники» международнай театральнай фестивальсь, «Вэйсэ-джаз» джазовай музыкань и «Декабрьские диверсанты» классическяй музыкань фестивальхне, а стане жа «Од вий» финно-угорскяй эстраднай моронь межрегиональнай фестивальсь. Отмечафтольхть и республиканскяй ламоц мероприятиятне, васенцекс конатнень еткста лисенди «Шумбрат, Мордовия!» народнай творчествань республиканскяй фестивальсь.
Важнай событиякс меля арасть торжестватне, конат лемтьфтольхть скульпторть С.Д.Эрьзянь шачемстонза 140 кизонь топодемати. Фкя инь мялень салайкс арась Русскяй музейса Эрьзянь работанзон выставкасна. Севернай столицаса тя ульсь скульпторть васенце персональнай экспозицияц. Юбилейнай торжестватненди аделавсь Баева велеса Эрьзянь Кудонц-музеенц капитальнай ремонтоц, одкстоптф сонь экспозицияц.
Традиционнай «Эрьзинскяй лувоматнень» эса примасть участия маластонь и ичкоздень зарубежьяста ламоц искусствоветтне. Ульсь «Возвращение гения» документальнай фильмать премьерац.
- Ковда тяда инголе етась церемония, кона лемтьфоль Мордовияса Федор Ушаковонь кизонц панжеманцты. Республикань Правительствась аноклась мероприятиянь план, конат лемтьфт адмиралть лятфнемста 200 кизонь топодемати. Тядде арьсекшнетяма стяфтомс Ушаковонди памятник Темниковаса, ушедомс работать флотоводецть усадьбанц петеманц-тиеманц коряс, панжемс од экспозицият и залхт сонь лемсонза музейса. Тяда башка, тядде достойнай организационнай уровеньца етафтомат торжественнай мероприятиятне, конат лемтьфт Советскяй Союзонь геройть Михаил Петрович Девятаевонь шачемста 100 кизонь топодемати, - азозе республикань Оцюнясь.
Мордовиянь Оцюнясь азсь спасибамань валхт культурань работникненди совестьс коре трудендаманкса. Арьсесь теест шумбраши и творческяй од сатфкс. А меле казьфтольхть казнетне.
«Мордовиянь Заслуженнай работник» званиясь максфоль Сараснкяень живописецненди Юрий Дыринонди и Никита Пичугинонди, «Мордовия Республикань культурань Заслуженнай работник» лемть получазь идень Республиканскяй музыкальнай школань-интернатонь педагогсь Марина Гурьянова, идень Республиканскяй хореографическяй школань преподавательсь Людмила Канцарина, Зубово-Полянскяй РДК-нь музыкальнай руководительсь Владимир Княжев, Саранскяень культурань Управлениять начальникоц Татьяна Салищева и 4№ Саранскяй ДМШ-т-нь преподавательсь Лариса Листратовати.
МР-ть Почетнай грамотаса казьфтольхть Республиканскяй краеведческяй музейть историческяй отделонц вятиец Светлана Телина и Ельниковскяй ДМШ-нь преподавательсь Надежда Гречишникова.
Трудовой сатфксонкса и культурать виияфнеманцты оцю путксонкса МР-нь Оцюнять Благодарностьса казьфтольхть П.С.Кирилловонь лемса 8№ библиотекать-филиалть заведующаец Нина Бояркина, Лямбирскяй райононь «Алмаз» культурно-спортивнай центрань методистсь Ольга Кочеткова, Большеберезниковскяй ДШИ-нь преподавательсь Лариса Чегодаева и Сире Теризморгань народнай хорть художественнай руководителец Валентина Ямашкина.
МР-нь Оцюнять Премиянц получазь: «Разгуляй» казачай моронь и кштимань ансамбльсь, И.М.Яушевонь лемса музыкальнай театрань концертмейстерсь Лариса Кильдюшова и «Морденс» арт-фолк оркестрть вятиец Юрий Буянкин.
Культурань работникнень профессиональнай праздникснон мархта стане жа поздравляндазень и казсь казнет МР-нь культурань и национальнай политикань министрсь А.М.Чушкин. Российскяй Федерациянь Культурань министерствать приказонц мархта народнай художественнай творчествать ванфнемаса и виияфнемаса оцю сатфксонь сатнеманкса «Народнай творчествань Заслуженнай коллектив» званиясь максфоль Чамзинкань «Дигаля» фольклорнай ансамбльти.