26 декабрьста Дубёнка аймаконь Поводимово велеса панжевсь Культурань куд. Велеряйхнень поздравляндама сашендсь Мордовиянь Оцюнясь Артём Здунов.
Культурань кудсь строяф велень территориятнень виияфнемаснон коряс программать мяльса кирдезь, сон арай пуромома вастокс и оцюфненди, и ёмлатненди. Тяса ули пяк цебярь ванома зал, 150 вастонди, библиотека, кружоконь ётафнемонкса помещения. Культурань од кудса арьсекшневи эреклафтомс вокально-инструментальнай ансамбльть, панжемс мокшэрзянь сёрмадомать коряс клуб.
Республикань вятись ванозе учреждениять, корхнесь шабатнень и оцюфнень мархта, конат марясазь ни тяса пряснон кода кудса.
Велеряйхнень приветствондамста Артём Здунов китькстазе, што велень территориятнень виияфнемаснон коряс государственнай программась, конань арьсезе Россиянь Президентсь Владимир Путин, лезни стройсемс тяфтама объектт — конат пяшкотькшнесазь велеряйхнень вешфксснон. «Сюкпря тянкса государствань вятити!» - мярьгсь Мордовиянь Оцюнясь.
Велеса лама од ломаньда, штоба нолдамс од ваймопожф Культурань кудти. «Тяфтама объектт стройсевихть марнек странать эзга и, конешна, минь Мордовиясонк. Катк тя клубть ваймоц фалу ули эрек!» - мярьгсь Артём Здунов.
Россиянь Минсельхозонь велень территориятнень виияфнемаснон коряс Департаментть директороц Ксения Шевёлкина мярьгсь: «Тинь аймаконте эряй, минь марясаськ шачема-касома масторти кельгомантень и патриотизмантень. Россиянь Велень хозяйствань министерствась сявондьсыне мяльс ся заявкатнень, конат афкукс эрявихть. Арьсян, штоба учреждениясь лездоль касондомс-вииякшнемс велети».
Дубёнка аймаконь оцюнясь Виктор Нефедов сюконясь республикань руководствати, Россиянь Минсельхозти, строительхненди объектть инкса, кодама ашель велеса 12 киза. «Велень клубсь фалу ульсь пуромома вастокс, тяза сашендольхть и сиретне, и оттне, корхнекшнельхть, содафнесть фкя-фкянь мархта, налхксесть свадьбат! А кодамоль тяса вокально-инструментальнай ансамбльсь, кона кельговсь марнек Мордовияса, а главнайсь — морсекшнель пакся кучкаса, фермаса, кепотькшнемок велень труженникнень мяльснон. Сембось тяса обязательна эряви эреклафтомс!» - мярьгсь сон.
Велеряйхне анокласть концертнай программа, кона васьфтьфоль кядень цяпамаса.
Мордовия Республикань Оцюнять пресс-службац