Мордовиянь Оцюнясь Владимир Волков 7 ноябрьста етафтозе Мордовия Республикань Оцюнять видеса Ветеранонь консультативнай советть расширеннай заседаниянц. Мероприятиясь етась Республикань Кудть Колоннай залсонза.
Мордовиянь лидерсь поздравляндазень эряфкшу ломаттнень Октябрьскяй революциять 102 кизонь топодеманц мархта, спасибась теест республикать и странать панчфокс панжеманкса лама кизонь трудснон инкса, а стане жа од ломаттнень патриотическяй воспитанияснонды путксонкса: ветеранскяй организациятнень лезксснон вельде вииякшнихть кадетскяй и юнармейскяй движениятне, работайхть поисковай отряттне, пуроптф памятникнень и обелискнень лангса шефства.
«Минь фкя инь васенце марстонь задачаньке маластонь пингти – анокламс Великай Победать 75 кизонь топодеманцты лемтьф мероприятиятнень», - китькстазе Владимир Волков.
Советть заседанияса республикань Оцюнясь тись итокт тяддень кизоти. Мордовиясь шумордасы сонь цебярь результат мархта, лац работамок национальнай проекттнень эряфс етафтомаснон лангса, конатнень азозень Россиянь Президентсь Владимир Путин.
«Экономикань пцтай сембе отраслятнень эса сатф касома. Учендови, што ВРП-сь касы 4 процентта, уликсть пцтай колмоцекс пяльксонц кассь тевс сувафтф эряма васттнень объемсна. Мордовияса национальнай проекттнень эряфс етафтоманкса тядде нолдаф 11 миллиардта лама цалковай – средстватне карьхцявихть социальнай ширде эрявикс кизефкснень решандаманкса, конат пичефтьсазь ломаттнень инь пяк, - азозе Мордовиянь Оцюнясь. – Тядде строяфт идень колма сатт и кафта школат, благоустроендаф 100 куд пирьф и общественнай территория. Шумордама лангса онкодиспансерть поликлиниканц, идень поликлиникать, ФАП-нь строямасна – сембоц капитальнай строительствань 200 лама объект. Республикань ламоц райоттнень эса тядде петьф-тиф сняра ки, мзяра аф тифоль мекольдень вете кизоста. А сембоц 2024 кизоть самс Мордовияса сави петемс 1100 вайгяльбень кувалмоса кит, и васендакиге – сят, конат азфтольхть избирательхнень наказснон эса».
Ветеранонь консультативнай советть заседаниянц пингста максфтольхть государственнай казнет.
Мордовия Республикань Оцюнять пресс-службац