Мордовиянь Оцюнясь Владимир Волков 28 октябрьста етафтсь совещания, коса корхтамась мольфтевсь коронавируснай инфекциять келемомста республикань здравоохранениянь системать работанц колга. Совещанияса примасть участия Мордовиянь Правительствать Председателец Владимир Сушков, Мордовиянь Оцюнять Администрациянц вятиец Андрей Богатов, МР-нь Правительствать Председателенц заместителенза Галина Лотванова, Сергей Тюркин, Александр Седов, Виктор Цыганов, МР-нь здравоохранениянь министрсь Олег Маркин.
Ванфоль лама кизефкс, конат сотфт тя аф теждя пингста медицинскяй учреждениятнень работаснон ладяманц мархта. Кода китькстазе республикань Оцюнясь, инь васенцесь тяниень пингть – работамс инголязь.
«Тефне коронавирусть мархта странаса и мирса стакат, миньцонк синь аф теждят: сярядида сняра жа лама, кода ульсь тунда, - мярьгсь Владимир Волков. – Сяс сембось эряви кирдемс кеме контроль ала: кода панчсевихть сярядихненди од васттне стационархнень эса, кода ащихть тефне лекарстватнень мархта, кода работайхть бригадатне больницятнень эса, кода работайхть скорай помощень бригадатне, кодамот скорай помощть работанц мархта сотф уликс прябалатне, кода минь работатама ся сярядихнень мархта, конат пчксихть аф стационарса, а амбулаторнайста».
Сембе тя кизефксненди шарфтфоль башка оцю мяль. Ванфтольхть ковиднай сярядихнень пчкафнеманкса Саранскяень медучреждениятнень и районнай больницятнень возможностьсна, тяконь лувксса корхтафоль пчксемань корпуснень переоборудованияснон колга, кислородть пачфтеманц и сонь резерванзон пуроптомаснон квалма. Корхтафоль лекарственнай препараттнень сатомшка лувксса кирдемаснон, а стане жа амбулаторнай сярядихнень пчкафнемаснон коряс первичнай звенать работанц колга.
Тяда башка азфоль, што республикаса коль касфневи коронавирусть лангс тиендеви тестированиятнень лувкссна. Тяниень пингть шиста тиендеви кафта тежяттнень малава тест.
Республикань Оцюнясь китькстазе, што эряви виияфтомс коронавируснай инфекциять каршес ащемать коряс работать, штоба валхтомс медицинскяй учреждениятнень и врачнень лангс прашенды сталмотнень.
Мордовия Республикань Оцюнять пресс-службац