16 октябрьста Республикань Кудса етась Дорожнай хозяйствань работниконь шити лемтьф торжественнай пуромкс. Мероприятиясь пуроптфоль-етафтфоль уликс санитарно-эпидемическяй вешфкснень мяльса кирдезь: участникне нолдазь тевс маскатнень и перчаткатнень, кирдсть социальнай дистанция, а шида тяда инголе тисть тест коронавируснай инфекциять лангс.
Торжественнай собранияс тертьфнень поздравляндазень Мордовиянь Оцюнясь Владимир Волков. Республикань Оцюнясь азозе, што кинь строямать эзда ащи промышленностть вииякшнемац, бизнесть парста вятемац, инфраструктуранй проекттнень эряфс етафтомасна и, конешна, ломаттнень эряфснон качествац.
Владимир Волков башка китькстазе, што дорожникне пцтай ашезь лоткафне работаснон пандемиять пингста. Тя макссь ванфтомс сембе ведущай строительнай организациятнень и трудовой коллектифнень. Тяддень кофнень итогснон коряс республикаса дорожно-строительнай работатнень объемсна етай кизоть коряс кассь 1,5-крда.
Пандемиянь условияса отраслять виияфнемаса башка вастса ащи «Безопасные и качественные автомобильные дороги» национальнай проектсь. Аньцек тядде кинь строяманкса Мордовияса нолдаф пцтай 7,5 миллиард цалковай (тяконь лувксса 4 миллиартта лама цалковай – нацпроектть коряс).
«Минь петтяма нинге сяда лама ки мелянь кизоть коряс – 8 участкат, конатнень марстонь кувалмосна 167 вайгяльбеда кувака, - мярьгсь Владимир Волков. Тя сатовсь федеральнай центрать ширень кирдеманц вельде. Минь спасибатама Россиянь Президентти В.В.Путинонди Мордовиянь дорожнай инфраструктурать виияфнемаса оцю лезксонкса! Монь стане жа мялезе спасибамс ширень кирдеманкса Российскяй Федерациянь Транспортонь министерствати, Федеральнай дорожнай агентствати и Госдумань депутаттненди В.Б.Ефимовонди и В.Б.Кидяевонди».
Тяддень важнай проекттнень еткста республикань Оцюнясь башка азозень Рузаевкать обходонц строяманц васенце этапонц, Строительнай ульцять эзга кить строяманц. Стане жа удалась петемс 10 вайгяльбеда кувака участка Рузаевка – Ковылкино – Торбеево трассать эса, тиемс капитальнай ремонт 5 вайгяльбень кувалмоса васта Саранск – Кочкурово – Пензенскяй областть границац киса.
Саранск ошень агломерацияса петьф 25 вайгяльбеда оцю кувалмоса 20 лама участка.
«Минь фалу сявондьсаськ мяльс ломаттнень мяльснон-арьсемаснон и старандатама петнемс инь прябалаву китнень, конатнень лангс сашенды сембода лама пеняцяма ломаттнень ширде, - китькстазе Владимир Волков. – Сай кизоть тя работась поладови. Саранскяень администрацияти эряви сяда эряскофтомс анокламань работатнень, штоба кода можна сяда курокста тиемс ремонт прябалаву участкатненди, тяконь лувксса Транспортная, Фурманова и Солнечнай ульцятнень эса. Эряви азомс, што ломаттнень пеняцямасна сидеста аф туфталфтомот. Ламоц китне аф мялень кеподихть. Ремонтонь тиемать мархта ряцок аф юкснема ямочнай ремонтть колгавок. Башка мяль эряви шарфтомс прябалаву объекттненди, конат сотнекшнесазь населеннай пункттнень социальнай объекттнень, школатнень, больницятнень, поликлиникатнень мархта. Ламотне еткстост азфтольхть избирательхнень наказснон эса. Мон корхнень ни, што нацпроектть рамкаса минь улихть эрявикс средстваньке, штоба петемс и строямс сембе китнень, конат азфтольхть избирательхнень наказснон эса. Минь обязаттама тиемс тянь!»
Региональнай дорожнай фондста субсидиять вельде шумордама лангса 2 вайгяльбень кувалмоса местнай китнень строямасна республикань 14 районца. Стане жа республиканскяй средстватнень вельде тядде петьфт подъезттне Рыбкино и Барки велетненди Ковылкинскяй районца, 3 вайгяльбеда кувака кит Лямбирскяй райононь Татарскяй Тавла велеса.
Мольфтеви активнай работа «Устойчивое развитие сельских территорий» федеральнай программать мяльса кирдезь. Маластонь пингть шумордави Саранск – Большие Березники – Дубенки кить кота вайгяльбень кувалмоса участканц реконструкцияц, а стане жа Ромодановскяй и Лямбирскяй райоттнень эса Вырыпаево – Николаевка и Кадошкинскяй и Старошайговскяй райоттнень эса Нагаево – Шувары китнень строямасна. Марса программать вельде одкстоптови пцтай 10 вайгяльбень кувалмоса кит.
Башка республикань Оцюнясь лятфтазе Саранскяйса Северо-Восточнай шоссеса колма сеттнень реконструкцияснон и капитальнайста петемаснон коряс стака проектть, кона шумордафоль тядде. Тяда башка, сентябрьста тифоль Кочкуровскяй районца Вьяс ляйть туркс седсь.
«Ули кода азомс, што тя республикаса аварийнай сеттнень петемаснон коряс оцю работать аньцек ушетксоц, - мярьгсь Владимир Волков. – Ташта сеттнень колга темась оржаста ащи марнек странаса. И мордовиясь ульсь фкякс ся региоттнень еткста, конат ушедсть корхтама тянь колга федеральнай уровеньца. Сяс монь мялезе азомс оцю спасиба Россиянь Президентти В.В.Путинонди сянкса, месс минь кулемазь и кирдезь ширеньконь. Правительствать Председателец М.В.Мишустин кемокстазе «Безопасные и качественные автомобильные дороги» нацпроектть лувксса «Мосты и путепроводы» федеральнай проектть. Аноклави башка программа автомобильнай китнень лангса искусственнай сооружениятнень строямаснон и нормативнай состоянияс пачфтемаснон коряс».
Мордовияса 47 объект (или сембе сеттнень 13 процентсна) аварийнайхть или малат тянди. Нинге 200 сооружениять состояниясна аф мялень кеподи.
«Сяс тяни ни минь тихтяма диагностика эрь объектть коряс, арьсекшнесаськ работатнень. Тяка пингть аноклави проектнай документациясь, сувафневихть полафткст региональнай проекттненди, дорожнай фондонь средстватненди. Кодак аньцек Россиянь Правительствать мархта улихть кемокстафт финансированиянь параметратне, Мордовияти эряви эстокиге кярьмодемс од федеральнай проектть эряфс етафтоманцты, - мярьгсь Владимир Волков. – Минь целеньке – сатомс сянь, штоба программати сувафтовольхть инь кржась 47 аварийнай седсь. 2024 кизоть самс сембе синь эрявихть петемс. Тянкса эрявксты 5 миллиартта лама цалковай. Арьсеф проекттнень етксот – Строительнай ульцять эзга од кить рамкаса путепроводть строямац, Коммунистическяй ульцять эзга кафта «химмашевскяй» сеттнень ремонцна, Ботевградскяй ульцять эзга седть петемац, а стане жа Ковылкинаса и Зубово-Полянаса машина кить туркс путепроводть строямац».
Марса 2 кизоста, мзярс эряфс етафневи национальнай проектсь, республикаса петьф ни 300 вайгяльбе региональнай, межмуниципальнай и местнай значениянь кит. И сяда тов тя объемтне кармайхть аньцек касфневома. Тяфта, сай кизоть республикаса ули петьф 265 вайгяльбень кувалмоса кит – 1,5-крда сяда лама тяддеть коряс. А сембоц нацпроектть коряс 2024 кизоть самс кинь строяманкса и петеманкса Мордовияса ули нолдаф пцтай 20 миллиард цалковай, 90 процентсна – федеральнай бюджетста.
«Тячи дорожнай организацияньконь работасна лац няеви, - мярьгсь Владимир Волков. – Мордовиянь эряйхне отмечсесазь од вельхксть качестванц и сянь, кода кирдевихть трассатне. Важна поладомс тянь коряс работать. Од китне должетт улемс аф пелькст, цебярь качествань и ламос служамс. Тя фкя инь васенце задачатне, конатнень путнесазь инголенк Россиянь Президентсь и республикань эряйхне».
Владимир Волков макссь торжественнай собраниянь участникненди казнет дорожнай строительстваса сатфксонкса и лама киза совестьс коре трудендаманкса, арьсесь кеме шумбраши и сяда товолдонь сатфкст Мордовиять панчфокс панжеманкса,
Мордовия Республикань Оцюнять пресс-службац