Мордовиянь Оцюнясь Владимир Волков примась участия котоце созывонь МР-нь Государственнай Собраниять 48 сессиясонза, кона лемтьфоль республикань законодательнай органть 25 кизонь топодеманцты.
В.Д.Волков, парламентарийхнень поздравляндамста, азозе, што Мордовиянь Госсобраниясь пуроптфоль странаньконь историяса фкя инь стака пинкнень.
«Эряфсь вешсь курокстонь и оцю полафткст. Васендакиге, эрявсь пуроптомс сембе уроветтнень эса вии и эффективнай власть, мрдафтомс народть ширде юмафтф довериять, - лятфтазе МР-нь Оцюнясь. – Важнай аськолксокс тя ширеса ульсть Государственнай Собранияв кочкаматне. Республикань мяльснон коряс кочкафтольхть васенце созывонь депутаттне».
Мордовиянь властень инь оцю законодательнай органць пуроптфоль 1995 кизонь январьста. «Именна эста республикать вятема арась фкя мяльс кирди команда, конань участниконзон вятезень инголи мяльсь эреклафтомс республикать, максомс ломаттненди условият нормальнайста эряманкса и достойнайста трудендаманкса, - азозе Владимир Волков. – Государственнай Собраниять васенце сессиянц пингста ни примафоль решения анокламс республиканьконь основной закононц – Мордовиянь Конституциять, конань мяльса кирдезь минь эрятама и трудендакшнетяма сембе ня кизотнень. Тяфта, 1995 кизонь 24 январсь арась ушетксокс оцюдонга оцю, арьсефонь сатни работати, кона мольфтеви республикаса векть нилецекс пяльксонц ни».
МР-нь Оцюнять валонзон коряс, Мордовиясь тячи ламода полафтсь цебярь шири, арась тяниень пингонь регионкс, конань инновационнай экономикац и промышленностец, передовой велень хозяйствац, козя культурнай эряфоц.
«Аш месть корхтамс, марстонь сатфксоньконь сатнемаса оцю васта занцихть Государственнай Собраниянь депутаттне. Тя кизотнень примаф закоттне тисть вии правовой пакся Мордовиять социально-экономическяй вииякшнеманкса, лездсть кемокстамс правопорядкать, ладязь государственнай властень и местнай самоуправлениянь оргаттнень работаснон, - китькстазе В.Д.Волков. – Тячи мялезе азомс спасибамань валхт народонь аф фкя лацонь представительхненди, конат разнай пингста ульсть Государственнай Собраниянь депутатокс. 25 кизоста депутатокс ульсть 208 ломанць. Фкясь еткстост – Юрий Васильевич Тутуков – ульсь сембе котоцьке созывонь депутатокс.
Госсобраниять историяц кемоста сотф сятнень лемснон мархта, кие разнай кизотнень вятезе Мордовиянь законодательнай властень высшай органть. Тя Николай Иванович Меркушкин, Валерий Алексеевич Кечкин, Валентин Васильевич Конаков. Госсобраниянь мекольце кафта созыфне лац работайхть Владимир Васильевич Чибиркинонь управлениянц ала.
Стане жа монь мялезе азомс сюкпря Госсобраниянь Аппаратть сембе сотрудниконзонды и ветераттненди депутатскяй корпусть работанц лац вятеманкса».
Кода китькстазе Владимир Волков, республикань парламентаризмать историяц козя народнай избранникнень цебярь работаснон мархта кода заседаниянь залса, стане и вастова – ломаттнень мархта сидестонь васедематне эсь округсост, участкасост и велесост.
Мордовиянь законодательхненди эсь лацонь ширекс фалу ульсь доступностсь и панжадокс улемась, граждаттнень праваснон инкса ащемась, ломаттненди лездомс анококс улемасна.
«Сембе ня кизотнень народнай представительхне эффективнайста работасть республиканскяй зконодательнай базать цебярьгофнеманц лангса, тиендсть надежнай правовой база республикать виияфнеманц коряс кизефкснень решандакшнеманкса, - поладозе МР-нь Оцюнясь. – Кода результат тячи Мордовияса пуроптф и марса федеральнай центрать мархта етафневи эряфс вииякшнемань оцю программа, кона арьсеф лама кизонди инголи. Сонь юрсонза национальнай проекттнень эряфс етафтомасна, конатнень азозень Россиянь Президентсь. Китькстаса, Мордовиять тяниень историясонза башка васта занци именна Российскяй Федерациянь Президентсь Владимир Владимирович Путин.
Сонь личнай участиянц пингста строяфт республикань ламоц промышленнай предприятиятне, социальнай сферань объекттне. Владимир Владимирович ульсь мархтонк, мзярда минь праздновандаськ Мокшэрзянь народть Российскяй государствань нароттнень мархта ладязь эрямаснон 1000 кизоонь топодеманц. Именна Президентсь примазе решениять сувафтомс Саранскяйть футболть коряс миронь чемпионатонь ошнень-организаторхнень лувксс.
Минь стане жа спасибатама властень федеральнай оргаттнень мархта минь инициативаньконь ширеснон кирдеманкса. Тейнек пяк питни Россиянь Правительствать, Федерациянь Советть и Государственнай Собраниять, а стане жа странань региоттнень эса законодательнай оргаттнень мархта сотрудничендамась».
Тяда башка, тяддень инь важнай событиякс арась Российскяй Федерациянь Конституцияти полафтксонь сувафтомась. Общероссийскяй голосованиясь панчсь од этап странать историяса, кемокстазень сембе цебярь полафткснень, конат ульсть Россияса мекольдень кизотнень.
«Конституциянь полатксне – тя работай граждаттненди и пенсионерхненди, од ломаттненди и шаба мархта семьятненди социальнай од гарантият. Тя социальнай справедливостень строямань од принцип, коса граждаттнень шумбрашисна и благополучиясна – инь оцю питнешитне, - китькстазе Владимир Волков. – Лятфтаса, што Общероссийскяй голосованияса Мордовиянь эряйхне няфтсть консолидированнай позиция. Вайгялень максома сашендсь эряйхнень 79 процентсна, Конституцияти полафткснень инкса вайгяльснон максозь избирательхнень 85 процентсна.
Тячи минь вантсаськ Мордовия Республикань Конституцияти полафткснень сувафтомаснон коряс законть проектонц. Синь водендафт республиканскяй законодательствать цебярьгофнеманкса, отвечайхть Россиянь Конституциять вешфксонзонды.Но эряви аф аньцек законодательнайста кемокстамс социальнай норматнень и гарантиятнень, а сатомс сянь, штоба синь пяшкотькшневольхть. Тянкса эряви стабильнай политическяй и социально-экономическяй ситуация, властень сембе уроветтнень лац ладяф работасна.
Нинге весть поздравляндасайне сембонь Мордовия Республикань Госсобраниять 25 кизонь топодеманц мархта!
Седи ваксста арьсян теенть сатфкст тевсонтт Мордовиять панчфокс панжеманкса, сонь эряензонды цебярь эряфонь максоманкса!»
Тяда башка, республикань парламентарийхнень поздравляндазь МР-нь Госсобраниять Председателец Владимир Чибиркин, Российскяй Федерациянь Федеральнай Собраниянь Федерациянь Советть сенатороц Владимир Литюшкин, «Мордовия Республикань муниципальнай образованиянь советть» ассоциациянц председателец Вячеслав Цыбаков. МР-ть эзга главнай федеральнай инспекторсь Михаил Сезганов лувозе ПФО-са РФ-нь Президентть полномочнай представителенц Игорь Комаровонь приветственнай адресонц.
Инь достойнай парламетарийхненди максфтольхть оцю государственнай казнет.
Сессиять пингста сувафтфтольхть полафткст Мордовиянь Конституцияти. МР-нь Оцюнять Администрациянц законодательствань и правовой экспертизань кизефкснень коряс Управлениять начальниконц заместителенц Олег Зиновьевонь валонзон коряс, Мордовиянь Оцюнять мархта сувафтфоль законть проектоц, кона водендаф МР-нь Конституциять Россиянь Конституциять вешфксонды отвечайкс тиеманкса.
«Законть проектонц арьсекшневи поладомс положенияса, конатнень мяльса кирдезь Российскяй Федерациять и Мордовия Республикать мархта марса вятеви кизефкснень лувксс сувафтовихть велень хозяйствась, од ломанень политикась, доступнай и качественнай медицинскяй лезксть обеспечендамац, общественнай шумбрашить ванфнемац и кемокснемац, - азозе Олег Зиновьев. – Тяконь лувксса семьять , тядятнень, алятнень и шабатнень араламаснон коряс кизефксне, семьяса шабатнень достойнайста воспитандаманкса цебярь условиянь тиемасна».
Тяда башка, законть проектонц мархта мярьгондеви сермадомс МР-нь Оцюняти од вешфкснень. « Мордовиянь Оцюняти поладовихть запреттне счетонь панчсемать, омба масторонь банкнень эса наличнай ярмаконь средствань и питнешинь ванфнемать коряс», - азозе О.М.Зиновьев.
Мярьгондеви лувомс виень юмафтыкс положениять, конань коряс вешеви республикань прокуроронь должностьс кочкамась согласовандама МР-нь Государственнай Собраниять мархта. Тяниень пингть, РФ-нь Конституциять марса кирдезь, субъектонь прокурорхнень назначандакшнесыне Федерациянь Советть мархта консультацияда меле Россиянь Президентсь.
Закононь проектть мархта мярьгондеви поладомс положениять, кона сотф качествань аф зависимай оценкань результаттнень колга обязательнай публичнай отчетть няфтеманц и ваноманц, культурань, образованиянь, здравоохранениянь, социальнай обслуживаниянь сферань организациятнень эса услугань макссемань условиятнень мархта.
Сессиять пингста ванфтольхть закононь лия проекттне.