Мордовиянь Оцюнясь Владимир Волков етафтсь рабочай васедема кинематографиянь Всероссийскяй государственнай институтть ректоронц Владимир Малышевонь мархта. Ширетне корхтасть Саранскяйса ВГИК-ть IX Международнай кизонь киношколанц етафтоманц, а стане жа сяда товолдонь сотрудничествать колга.
Киношколась етай Саранскяйса 2017 кизонь 3-21 июльста. Мордовияв сайхть кода ушеткшни кинематографисттне, стане и эсь тевонь признаннай мастерхне – и российскяйхне, и омба мастороннетне. Колма недялянь потмоста киношколань участникне кармайхть содафнема Мордовиять культуранц и коензон-обуцянзон мархта, а меле няфтьсазь ваныти республикать колга эсь документальнай фильмаснон.
Владимир Волков азсь кемама сянди, што студенттне-кинематографисттне муйхть Мордовияса лама мялень салайда творческяй арьсемаснон пяшкодеманкса. Стане жа Мордовиянь Оцюнясь отмечазе, што Саранскяйса киношколать етафтомац может арамс ушетксокс республикать и кинематографиянь Всероссийскяй институтть еткса сотрудничествати. Рабочай васедемать пингста корхтафоль республикань творческяй коллектифненди профессиональнай кадрань анокламать коряс марстонь работать колга.
ВГИК-ть ректороц азсь Владимир Волковонди благодарностень валхт лац примаманкса, отмечазе Мордовияса культурать оцю уровененц, ошть, а стане жа велень территориятнень благоустроенностьснон.
Рабочай васедемать эса участия примасть МР-нь Правительствать Председателенц заместителец Галина Лотванова, республикань культурань и национальнай политикань министрсь Анатолий Чушкин, ВГИК-нь актерскяй мастерскойть художественнай руководителец, РФ-нь народнай артистсь Владимир Фокин, РФ-нь Госфильмофондть вятиец Николай Бородачев.
Мордовия Республикань Оцюнять Пресс-службац