Ельники велень эряйсь Александра Горшенина сась приёмс кизефкс мархта, кона аф решандакшневи лама пинге ни. Эрь кизоня кизоть саманц мархта Миронь и Коммунистическяй ульцянь эряйхнень эвондакшнихть прябаласна водоснабжениять мархта.. «Прябаланьке минь кунардонне, - азозе авась. – Сянкса, мес ульцятне ащихть вярьгак вастса, ведсь тейнек кизонда аф пачкотькшни, кудсонк сон уленди аньцек веть».
Кода азозе республикань Энергетикань и жилищно-коммунальнай хозяйствань министерствань представительсь, Ельниковскяй районть заявкац ванф и ширец киртьф, водоснабжениянь сетьтне савихть петемс 340 метрань кувалмоса.
Республикань Оцюнясь китькстазе: эряви аф аньцек полафтомс трубатнень, но чистендамс эрявикс диаметраса водоснабжениянь сетьть, штоба ведсь шудель эзганза сяда лац. «Важна, штоба диаметрась улель сатомшка – аньцек эста прябалась машфтови, - отмечазе Артём Здунов. – Пшкядема эряйхнень эзда минь получаме, средстватне улихть пачфтьфт. Тялоть самс сембе работатне пяшкодемат».
Мзярошка пшкядемась сотфтольхть куд пирьфнень петемаснон-мазоптомаснон мархта. Тяфтама прябала мархта республикань руководительти сашендсть Саранскяень и Рузаевкань эряйхне.
«Минь куд пирьфоньке пяк кальдяв: крхка лоткт, аш тротуархт, машинатненди аш коса шаромс, маласонк ащи идень сад», - азозе Саранск ошень Октябрть 70 кизонц проспектть эзга 95№ кудонь эряйсь Светлана Лаврушкина.
Тяфтама жа прябалат васьфнихть Рузаевкаса Победать 40 кизонц ульцянь 7№ кудонь эряйхне. «Кодак строяф кудсь сонь пирьфоц вестевок апак петель, - азозе Рузаевкань эряйсь Ольга Худякова. – Надиятама аньцек Тонь лезксцень лангс».
Мордовиянь Оцюнясь путсь муниципалитетонь руководительхнень инголе задача сяда курокста решандамс «Формирование современной городской среды» программати тя куд пирьфнень сувафтомаснон коряс кизефксть и тиемс ремонтть сай кизоня.
Саранскяень Полежаевонь ульцять эзга 74№ кудонь эряйхнень – лия прябаласна: аш идень площадкасна. Мзярда 2018 кизоня куд пирьфти тиевсь ремонт, шабатненди ярмакне ашесть сата. «тяни минь кудсонк пяк лама идь мархта семьяда. Шабатне ёмланят, но налхксемс теест аш коса, хуш васта идень площадканди ули. Лездода минь шабаньконди». – пшкядсь республикань руководительти домкомсь Галина Соколова.
Тя кизефксть Мордовиянь Оцюнясь стане жа сявозе башка контроль алу – идень площадкать арьсекшневи тиемс сай кизоня.
Нинге фкя оржа прябалась – тя китнень петемасна. Тяфтама пшкядемада лама, но синь решандакшневихть. Темниковскяй райононь эряйсь Светлана Асаева пшкядсь эняльдема мархта петемс Кушка велесь – Польское Адашево велесь кить 10 вайгяльбень кувалмоса участканц. «1991 кизоста сявомок кись ашезь няенде фкявок капитальнайста петема, - отмечазе заявительницась. – И нинге пяк эняльттяма нолдамс ширезонк автомобильнай маршрут – миньцонк лама пенсионерда, а такситне сявихть фкя шири ардоманкса тёжянь цалковай».
Кода азозе МР-нь транспортть и дорожнай хозяйствать коряс Госкомитетть председателец Валерий Кандрин, кизефкссь ули решандаф. «Кемокстаф контракт проектно-сметнай документациять анокламанкса. Петемати кярьмоттяма строительнай сай сезонть», - пачфтезе сон.
Кода кемокстазе Темниковскяй райононь Оцюнясь Олег Родайкин, ули нолдаф автобуснай маршрутовок населённай пунктти.
Инсаронь эряйсь Елена Коновалова сась эняльдема мархта строямс кить Г.Я.Меркушкинонь ульцянц эзга. Проектно-сметнай документация тя объектть лангс ули – райононь власттне старандасть. Мордовиянь Оцюнясь макссь поручения республикань Минстройти мумс возможность, штоба сай кизоня кись улель строяф.
«Сембода главнайсь – пингть кочкамс, штоба торкне афольхть колав, штоба сембось улель тиф эсь пингстонза», - китькстазе Артём Здунов.
Курокстонь работа Минстройть ширде Мордовиянь Оцюнясь вешсь нинге фкя объектть – Ромоданово посёлкань од микрорайонца кить строяманц коряс. Кить учендсазь Лесной, Дружба, Миронь, Свободань, Ломоносовонь и Гагаринонь ульцятнень эса эряйхне. Тя кизефксть коряс приёмс Мордовиянь Оцюняти сашендсь Ромодановань эряйсь Ольга Миняева. Артём Здуновонь поручениянц коряс кить строямац ушедови 2023 кизоня.
Мордовия Республикань Оцюнять пресс-службац