17 июльста Республикань Кудса Мордовиянь Оцюнять аф лама пингс тевонзон тиендиснон Артём Здуновонь председательстванц ала етась МР-нь градостроительнай советть омбоце заседанияц. Лятфтасаськ, Мордовия Республикань градостроительнай советсь пуроптф республикань Оцюнять аф лама пингс тевонзон тиендиснон мяленц коряс, сонь задачац – макссемс оценка азови градостроительнай решениятненди, аноклакшнемс рекомендацият республикать архитектуранц цебярьгофнеманц и градостроительнай виияфнеманц мархта сотф кизефкснень коряс. Советть лувксс сувасть профессиональнай сообществань представительхне – ученайхне, архитекторхне, властень органонь вятихне и общественникне.
Заседаниять пингста корхтафоль Саранскяйса кафта од микрорайоттнень строямаснон колга – Волгоградскяй ульцять и Кочкурова вели (Тавла ляйть маласа) кить еткса. Корхтамась мольфтевсь 6 микрорайонть и 3 микрорайонть колга.
6 микрорайонць кармай строяф стадионть и Инсар ляйть маласа. Кода азозь проектировщикне, тяса кармай пешеходнай бульвар, кона сотнесы Инсарть набережнаенц 2 микрорайононь уликс бульвархнень мархта. Стане жа тяса кармай идень сад. Главнай принципне – цебярь васта микрорайононь эряйхненди, виияфтф социальнай инфраструктура. Мордовиянь Оцюнять аф лама пингс тевонзон тиендисна азсь мяль сувафтомс аноклави концепцияти Инсарть набережнаенц и ляйть маласта парковай зонать тиемаснон-мазоптомаснон коряс варианттнень.
3 микрорайонца (тя Кочкуровав кить кереж ширесонза участкась) стане жа арьсеф строямс идень сад, а школась строяви аф ичкоздень вастса – шабрань 4 микрорайонца.
Градостроительнай советонь участникне шназь 6 и 3 микрорайоттнень строямаснон концептуальнай решениянзон. Замечаниятне, конат азфтольхть корхнемать пингста, сявовихть мяльс мекольце проекттнень анокламста.
Мордовия Республикань Оцюнять пресс-службац