7 апрельста Мордовиянь Оцюнять аф лама пингс тевонзон тиендисна Артём Здунов етафтозе республикаса правопорядкать обеспечендаманц коряс совещаниять координационнай заседаниянц, коса примасть участия силовой структурань, министерствань и надзорнай ведомствань вятихне.
Башка мяль шарфтфоль уроз иттненди эряма вастонь максомста нарушениятнень лангс лихнемаснонды, сявондемок мяльс РФ-нь законодательствать. Тячи республикаса очередьса ащихть 1043 ломань. Синь квартираса обеспечендаманкса Мордовияти эряви 1 миллиард цалковай. Прокурорхне мушендыхть нарушеният нльне тя сфераса. Тяфта, фкя муниципальнай районца содавсь, што тястонь власттне рамасть квартира 1 миллион цалковайда, конань афкуксонь питнец аф 650 тежянь цалковайда лама. Должностной лицатнень тевснонды ули максф правовой оценка.
Мордовия Республикань Оцюнять аф лама пингс тевонзон тиендисна азозе, што тяфтама случайста ужяльдемати васта аш. «Кда тяфтама преступления ульсь тиф, тянкса эряви казямста наказамс, - мярьгсь Артём Алексеевич. – Тя ломаттненди аш мезевок святой. Стаковок ярмаконь средствада кржа, а синь нинге тяфтама карьхцьс вятнихть».
Стане жа совещанияса корхтафоль правонарушениятнень колга, тяконь лувксса коррупционнайхнень, конат лихтьфтольхть национальнай и федеральнай проекттнень эряфс етафтомста. Заказчикнень и подрядчикнень работаса аньцек республикань прокуратурать мархта муф 400 лама нарушения. Дисциплинарнай ответственностьс таргафт 100 лама должностной лицась, 68-сь – административнайс, срхкафтфт 9 уголовнай тефт.
Мордовия Республикань Оцюнять пресс-службац