Заседаниять панжемста региононь руководительсь китькстазе, што васедемать васенце целец – пачфтемс информациять сянь колга, ширень кирдемань кодама мерат нолдай тевс регионць бизнес-сообществати лездоманкса, азондомс федеральнай уровенень гослезксонь антикризиснай мератнень колга.
«Региононь кота оцю промышленнай холдинкне (конатнень структураса 27 предприятия) сувафтфт ни российскяй экономикаса системообразующайхнень лувксс. Тя панчси теест ки льготнай банковскяй услугатненди, финансовай лезксти и госгарантиятненди. Республикань промышленнай комплексти сырьёнь, материалонь, запасной частень и оборудованиянь од поставщикненди промышленностень региональнай фондть видеса пуроптф кооперациянь и импортонь полафтомань Центра», - азозе Мордовиянь Оцюнясь. Тяниень пингть центрась пуроптозень товархнень, конатненди эряви вешемс отечественнай аналогт. Центрась мольфти оцю работа региононь предприятиятнень вешфксснон коряс российскяй производительхнень и дилерхнень вешфксснон коряс.
Промышленностьса ширень кирдемань уликс мератнень колга крхкаста азондсь Мордовиянь промышленностень, наукань и од технологиянь министрсь Игорь Губайдуллин. «Промышленностень виияфнемань региональнай фондса тевс сувафтфт льготнай финансированиянь вете региональнай программат: займать лувксоц 200 миллион цалковай 1 процентста сявомок 5 проценттненди молемс ставка алу. Арьсекшневи докапитализациянь сумма – пцтай 427 миллион цалковай. Промышленностень виияфнемань федеральнай фондсь максси займат высокотехнологичнай продукциянь анокламанкса, импортонь полафтоманкса. Мордовиянь предприятиятне прважасть 2,3 миллиард цалковаенди заявкат», - азозе Игорь Губайдуллин.
МСП-нь корпорациять мархта тевс нолдафт кредитованиянь льготнай программат, кредитть инь оцю лувксоц 2 миллиартт цалковай. Сон максови инь кржась 8,5 процент алу, инь ламось – 15 процент алу.
Мордовиянь экономикань, торговлянь и предпринимательствань министрсь Алексей Грибанов азондсь IT-отрасляти инвестпроекттнень и налоговай послаблениятнень мяльса кирдезь кредиттнень коряс процентнай ставкать субсидированиянц колга.
Населениять заняфшинц сферати нолдаф 179 миллион цалковай, синь карьхцявихть аф лама пингонь покодема вастонь панжеманкса, общественнай работатненди ломаттнень водендаманкса, а стане жа сотрудникнень одукс тонафнеманкса.
«Тя ширень кирдемась афкуксонне! Ярмакне регионти сашендыхть, и аф ёмлат, но эряви строгай отчётность, сяс документациять аноклакшнесась внимательнайста, профильнай министерствась максы тянь эса лезкс эрти», - мярьгсь республикань Оцюнясь.
Мордовиянь Правительствать Председателенц васенце заместителец Игорь Фрейдин китькстазе, што тяниень пингть федеральнай центрать уровеньца ванондови дружественнай странатнень эзда кирьфтаф программас коре поставкань кизефкссь.
«Оримэкс» ООО-ть комерческяй директороц Руслан Начаркин азозе, што тяниень пингть предприятиясь козякофневи оборудованияса, конань тевс нолдамац маластонь пингть лезды касфтомс объёмтнень.
Промышленнай туризмать колга корхтась Мордовиянь Оцюнять старшай советникоц Виктор Степанцов, кона кошардозень республикань предприятиятнень виияфнемс тя ширеть. «Предприятиятнень эса эрявихть музейхть, содафтомань экскурсият, конат аф аньцек няфтелезь производствать эсь лацонь ширензон, но и салальхть мяль. Салалезь кассы поколениять мяленц, кошардолезь кельгомс предприятиянтень, шять, сотнемс мархтонза эряфснон», - китькстазе Виктор Степанцов.
«Эряви касфнемс панжадокс улемась. Эрть эздонт ули эсь лацоньшиц, эрявихть аньцек цебярь проектнай решеният. Мялень салай экскурсионнай маршруттне лездыхть содамс колгантт и сяльде няфтемс лиятненди», - мярьгсь меколи Артём Здунов. Сон стане жа пшкядсь предприятиянь руководительхненди нолдамс тевс коронавирусть эзда ваймамань пингть сотрудникненди диспансеризациянь ётафтоманкса.
Мордовия Республикань Оцюнять пресс-службац